保級終極戰砌丙組仔
德國聯賽今晚上演終極戰，由德乙第16名奧厄同德丙季軍卡爾斯魯厄進行次回合附加賽，爭奪最後一個德乙席位，首回合卡爾斯魯厄主場賽和0比0，不過呢支德丙球隊始終級數有限，首回合主場都只能死守，作客難望越級挑戰，黑柴推介奧厄主勝。
（周三凌晨零時15分開賽）
奧厄前季由德丙升上德乙，上季表現依然甚佳，可惜神奇少帥泰迪斯高畀史浩克撬走，今季後勁不繼淪落尾三要踢附加賽，不過聯賽最後一戰相當冇運，喺球證多次不利誤判後，仲要畀達斯泰特絕殺，最終由贏變輸。去到附加賽首回合作客卡爾斯魯厄，教練杜爾斯採安全至上嘅穩陣踢法，雖然控球指數超過6成，最終都未能撕破死守嘅卡爾斯魯厄防線，仲有主力右翼衞列蘇圖上半場尾段傷出，今仗未能上陣，不過佢哋平均實力佔優，而且主場表現遠勝作客，今晚有力喺fans面前贏波保住德乙席位。
卡爾斯魯厄靠死守難創奇迹
卡爾斯魯厄教練阿萊奧斯舒華斯作風更保守，首回合有主場之利都唔敢攻，希望留番今仗至同奧厄博一鋪，不過進攻組織能力嚴重不足，往往只能靠快速反擊，旨意今季喺德丙入咗17球嘅射手舒利奧辛拿喺前線搵食，可惜呢位前鋒經過整季辛勞後季尾立油，近3仗交白卷之餘，比賽尾段仲出現嚴重體能下滑問題，今晚作客冇本錢同奧厄搶攻，佢哋近3次作客奧厄全敗，合共失咗7球只入1球，難創造升班奇迹。