周末美職激戰連場，又等我阿King畀大家過關貼士，其中周日清晨西雅圖海灣者將會主場面對皇家鹽湖城。海灣者近期開局踢法保守，近4仗聯賽半場都同對手打和，今仗半場和走唔甩。
（無綫myTV SUPER 302台周日清晨5時直播）
上屆殺入季後賽決賽嘅西雅圖海灣者，今季開咧表現可以話幾曳，現時喺西岸積分榜排到下游位置，而且攻擊力大減，暫時係美職入球數最少嘅隊伍，其中球隊上屆頭號射手兼隊長丹普西，今季至今都未開齋狀態低迷，佢哋惟有以守代攻，尤其開波初段都唔敢主攻，呢場面對作客表現欠奉嘅皇家鹽湖城，相信吹半場雞前兩軍都難打開紀錄。
紅牛奧蘭多城「大」晒
同日朝早，有紐約紅牛主場鬥費城聯，紅牛火力勁就人人都知，球隊近8次聯賽全開3球或以上，呢場中位數2.5球嘅入球大冇走雞（無綫myTV SUPER 302台周日早上7時直播）；最後奧蘭多城主場火併芝加哥火燄，火燄作客踢法絕對唔縮骨，經常同對手演入球騷，近4場作客更全開3球或以上，中位數2.5球嘅入球大值捧。
（無綫myTV SUPER 303台周日早上7時30分直播）