升班終極鬥細均力敵
英冠升班附加賽今晚上演終極一戰，阿士東維拉同富咸將會喺溫布萊球場交鋒，爭奪來季英超最後1個席位。呢場大戰關乎1.7億鎊（約17.7億港元）收入，雙方定必謹慎應戰，避免犯錯令全季努力付諸流水。維拉喺附加賽以守為攻效果唔錯，牌面較強嘅富咸季尾狀態下滑，未必敢輕率主攻，預料兩隊驚輸唔會亂嚟，博入球細好路。
（周日凌晨零時開賽）
英超球隊收入向來豐厚，今仗邊隊可以升班，未來3年至少有1.7鎊收入，為名為利壓力都勁大，今仗好難唔踢得綁手綁腳。睇番過去5年英冠升班附加賽決賽，5場波都係勁少入球，全部總入球都唔超過2球，包括上年哈特斯菲爾德同雷丁踢足120分鐘都交白卷。
維拉近7仗5場保清白
維拉今季拎到英冠第4位，附加賽兩回合計以1比0淘汰米杜士堡，喺爭升班嘅關鍵時刻，以泰利、侯頓等老將為首嘅防線起到好大作用，領隊布魯士防守戰術滴水不漏。阿士東維拉喺近7仗賽事有5仗保持不失球，其中6仗總入球為2球或以下，穩中求勝政策有良好效果，今仗決戰肯定會沿用呢個戰術。
擁有阿歷山大米祖域、賴恩施斯隆等新星嘅富咸，在聯賽一度連續23仗不敗，可惜喺煞科戰輸波即錯失直接升班資格，附加賽首仗亦以0比1輸畀打比郡，好在次回合反勝2比0晉級。2場敗仗可見，富咸喺壓力下往往表現失準，射手阿歷山大米祖域亦陷入球荒，富咸要攻破維拉大門有難度，決賽場合難免踢得謹慎，開入球細機會極高。