今晚歐聯決賽，筆者內心非常矛盾。紅軍高強度壓迫戰術堅刺激，可觀性甚高，只係碰上史上捧走歐聯冠軍次數最多嘅皇馬，始終都要理智啲，所以我會小注皇馬，但內心就想紅軍可以封王。
利物浦穆罕默德沙拿嘅職業生涯，係個勵志故事，從首次登陸英超被車路士放棄，轉戰意甲重生，去夏高價重返英超備受質疑，直至現在炙手可熱，季尾擸盡個人獎項，傳達出一個訊息：人生總會遇到挫折，但只要相信自己積極面對，始終會否極泰來。
紅軍主帥高普擅於發掘球員潛力，要求球員具備充沛嘅體能狀態，完成高強度壓迫打法，尤其係中前場球員，既係攻擊手，亦係防線前第一道屏障，一開波即發動閃擊戰，每每贏對手2、3至4粒，睇到粉絲熱血沸騰。但因此成為球迷熱捧對象，特別係英國傳媒不斷吹噓，反而置紅軍於不利境地。
皇馬曾12次稱霸歐洲，近4年更3奪歐聯，實力及經驗俱備，C朗仍然士哥不斷，近年無論係球會抑或國家隊戰績，呢位葡萄牙隊長逆流而上，絲毫未有衰退迹象。假如皇馬主帥施丹起用威爾斯快翼加里夫巴利的話，「艦隊」贏波機會高唱入雲。不過，筆者都係嗰句，儘管小注皇馬，但仍然希望紅軍捧盃，寧願輸一百幾十，都好過金錢、心靈上雙輸。