加勒比海地頭龍為世盃試刀
明早有場國際賽熱身賽，巴拿馬主場對北愛爾蘭，中北美洲球隊巴拿馬爆冷首次打入世界盃決賽周，成為一路異軍，大家對呢個國家認識最多嘅事，可能係電影《賭神》經典對白：「巴拿馬總統同我都算有啲交情。」踢波當然係講實力，巴拿馬近6次主場出擊取得4勝2和，絕對唔嘢小，足以擊敗到加勒比海「度假」嘅北愛爾蘭。（周三早上9時開賽）
巴拿馬可以進身決賽周，最關鍵係第5圈外圍賽，5場主場都不敗，包括打和2支中北美霸主墨西哥同美國，以及最後1戰擊敗哥斯達黎加。巴拿馬去到俄羅斯踢決賽周，可能冇料到，但今場仍然喺自己地頭比賽，繼續值得信賴。
至於巴拿馬最值得留意嘅球員，一定係29歲前鋒加比爾托利斯，佢早於11年前已經去過曼聯、華倫西亞試腳，其中第2次去曼聯試腳期間，因為受傷而未獲留用。不過，加比爾托利斯始終有實力，佢今季智甲為侯治柏度上陣15次，已轟入9球，入波率極高，有力製造驚喜。
北愛冇份決賽周陪太子讀書
另一邊廂，北愛爾蘭冇份踢今屆世界盃決賽周，今次遠赴巴拿馬比賽，純粹陪太子讀書，備戰態度肯定唔及對手，甚至抱度假心態，趁機去加勒比海享受陽光與海灘，捧對家啱數。