溫布萊球場一連3日嘅升班決戰，今晚輪到英乙附加賽做壓軸，由高雲地利惡鬥埃克塞特，爭奪升上甲組嘅資格。季中一度沉淪嘅高雲地利，嚟到季尾火力全開，搶到附加賽資格仲殺埋入決賽，今仗火併埃克塞特繼續做「大」騷！
（周一晚10時開賽）
埃克塞特後防麻麻
高雲地利上季降落英乙，今季喺羅賓斯領導下總算有起色，尤其前線入球能力大大增強，蘇格蘭射手馬克麥紐迪近4仗攻入5球狀態巔峰，成為高雲地利爭升班最強武器。高雲地利近9仗比賽都大踢進攻足球，其中7仗總入球達3球或以上，升班關鍵時刻當然會沿用最擅長嘅進攻戰術。
埃克塞特今季聯賽排第4位，最大問題係防守力麻麻，近11場比賽只得2場可以保持不失，好在進攻都交到貨，今仗鬥高雲地利靠火力決勝負，入球大值得捧場。