歐聯曲終人散，另邊廂俄羅斯世盃仲有唔夠廿日就開波，各支決賽周球隊都要為正選人腳、陣式作出試煉，其中法國、南韓、葡萄牙同突尼西亞喺周二凌晨踢熱身賽，正好畀領隊們睇下手頭上嘅「架生」狀態，而球員亦要為爭位而努力，精彩可期！
法國攻擊手 爭位大陣仗
世盃奪標熱門之一嘅法國，今晚深夜於主場友賽愛爾蘭。法國近年人才輩出，可惜絕大部分精英集中於中前場，反而防線一直未能予人信心，從球隊近6仗友賽入17球失8球、5仗總入球開3球或以上表現，足證現時法國攻強守弱，今仗中位數向2.5/3球嘅大盤埋手最明智。
（周二凌晨3時開賽）
法國喺決賽周被編入C組，同組對手包括丹麥、秘魯及澳洲。法國領隊迪甘斯已落實決賽周23人大軍名單，基沙文、基利安麥巴比、基奧特及保羅普巴等主力悉數入選，不過部分好手如拿卡錫迪及安東尼馬迪爾等只能列入後補名單，可以睇到法國中前場有人滿之患，入選球員為爭取正選更要拚盡全力。
不過，法國中前場雖然人才濟濟，可惜後防仍有隱憂，阿仙奴中堅哥斯尼重傷緣盡決賽周，另一中堅華拉尼因代表皇馬剛踢完歐聯決賽，今仗未能歸隊，法國近6仗友賽雖共入17球卻失掉8球，今仗華拉尼缺陣，勢必令到本已不穩的防線雪上加霜。
愛爾蘭有本錢鬥攻
愛爾蘭自從羅比堅尼於2016年歐國盃後宣布退役，球隊已適應過渡期，今屆世盃歐洲區外圍賽，愛爾蘭於D組僅以2分之微屈居塞爾維亞排小組第2，之後轉戰附加賽不敵丹麥，雖無緣躋身決賽周，但表現已算不俗。愛爾蘭今次點兵仍以英超兵為主，沙恩朗、約拿芬禾達斯等皆在陣中，無心理包袱下有本錢跟法國鬥攻，預期會上演1仗入球騷。
南韓試驗白老鼠 細味洪都拉斯
雖然今晚南韓主場迎戰洪都拉斯場友賽，將會係「太極虎」隊長奇誠庸取得百頂國家隊喼帽嘅大日子，不過飽受傷患困擾嘅南韓，至驚係再添傷兵，打嚟難免縮手縮腳，呢啲熱身波都係博入球細正路啲。
（周一晚7時開賽）
傷兵困擾唔敢冒進
試陣之餘點樣能夠避免增加傷兵，係南韓今仗主要目的。自從28人名單公布之後，後衞金敏在、中場權昶勳、廉基勳、前鋒李根鎬先後打柴，FC東京中堅張賢秀亦足踝傷久治未愈，金珍洙嘅傷勢同樣進展緩慢，幾個星期冇練波，去唔去到俄羅斯好成疑問，三條線都有大批十字兵，令主帥申台龍頭痛到嘔，試出一個理想排陣係當務之急。
咁點試法呢？效力意甲維羅納嘅20歲小將李昇祐係其中一個重點，因為喺法甲迪安踢到識飛嘅權昶勳足腱撕裂要抖幾個月，冇咗佢，孫興民要揾另一個攻擊力強嘅隊友從後支援，依家可以考慮嘅除咗黃喜燦，全無A級國際賽經驗嘅李昇祐，都係白老鼠之一。至於入選引發爭議嘅攻擊中場李青龍，已經今非昔比，今季喺英超水晶宮只上陣10次，唔使旨意佢喺進攻有乜建樹。更吹脹嘅係，李青龍自己知自己事，為求入到23人大軍名單，同申台龍傾過轉型，應承連翼衞都肯踢，佢出現喺後防會踢成點？同樣係一個試驗重點。
講真，陪南韓拍跳嘅洪都拉斯氣力、速度兼備，但就作戰心態成疑，如果同「太極虎」鬥歎慢板，呢場友賽恐怕同分隊練習賽冇乜分別，足智彩仲將中位數下調至2/2.5球，照揀入球細穩陣。
葡萄牙冇C朗一樣夠炒突
葡萄牙大軍今晚深夜主場出擊，迎戰非洲勁旅突尼西亞。葡萄牙今仗雖缺少王牌基斯坦奴朗拿度（C朗），不過整體實力仍高於對手一大截，加上葡萄牙近6次於友賽面對非洲兵取得4勝，包括過去2屆世盃決賽周前均順利大捷，今仗讓球主勝有2倍抵玩。
（周二凌晨2時45分開賽）
葡萄牙今屆世盃身處B組，同組對手有西班牙、伊朗及摩洛哥，今次約戰突尼西亞，明顯係針對同組嘅非洲代表摩洛哥。葡萄牙近6次友賽非洲球隊獲4勝，臨近世盃決賽周前嘅熱身賽更格外認真，上屆2014巴西世盃前，葡萄牙曾以5比1大勝喀麥隆；前屆出戰2010南非世盃前，葡萄牙亦先後大勝莫桑比克同喀麥隆，今次料一如以往拿非洲兵祭旗振士氣。
人腳鼎盛實力高一截
葡萄牙已公布決賽周23人大軍名單，王牌C朗剛踢完歐聯決賽而缺陣，不過陣中仍有哥利斯馬、祖奧馬里奧及摩天奴等2016歐國盃冠軍功臣，加上貝拿度施華、安達施華等中前場新星冒起，戰鬥力可堪信賴。
突尼西亞於決賽周被編入G組，除要挑戰2大歐洲勁旅比利時及英格蘭，對手仲有首次參賽嘅巴拿馬。依家突尼西亞29人集訓名單中，唔少球員來自法甲或法乙球會，質素難與葡萄牙相比。而且突尼西亞對上4次進身世盃決賽周皆於分組賽出局，實力有限，一於捧葡萄牙讓主。