決賽周D組被視為今屆賽事死亡之組，4路雄師各擅勝場，其中曾經喺98世盃勇奪季軍嘅克羅地亞，擁有一眾世界級主力，絕對有力殺出重圍；至於首度打入決賽周嘅冰島，經過2016歐國盃驚喜打入8強，已經證明實力，今次究竟會否再創奇迹，值得大家期待！
維京新丁臣級陣容
喺2016年歐國盃爆冷打入8強嘅冰島，陣內一眾被譽為「最強年代」嘅成員，難得終於歷史性首度踏足世盃決賽周嘅大舞台，當然希望又一次創造奇迹！兩年前展現出驚人鬥志嘅「維京人精神」，今次都會繼續係冰島爭勝嘅最強武器。至於久休傷愈嘅中場發電機基菲爾施古臣，則會係主宰冰島能否再創佳績嘅最重要人物！
將會成為打入決賽周史上人口最少國家嘅冰島，陣內近年人才輩出，除咗效力英超愛華頓嘅基菲爾施古臣之外，包括般尼嘅貝治古蒙臣同德甲奧格斯堡前鋒艾費特芬保加臣等，均喺歐聯最頂級聯賽角逐，每星期都同緊一班世界頂級球員較量，自然進步神速，亦間接令國家隊戰鬥力大幅提升。
靠基菲爾施古臣食胡
不過，自從今年3月10日便因膝傷一直休戰至今嘅基菲爾施古臣，最終能否及時康復，始終難講。呢部冰島發電機一旦失靈，將可能令球隊攻守失效，要喺分組賽殺出重圍，將會難上加難。
50歲嘅主帥賀基姆臣，兩年前已經證明咗自己能力，簡單嘅「442」陣式配合連繫緊密嘅整體足球，令冰島成為歐洲球壇新勢力，縱然進攻能力未算太強，但出色防守卻令佢哋變得難以被擊倒。冰島喺兩年前歐國盃曾經將歐洲一線嘅英格蘭打低，而喺今屆世盃外圍賽，則力壓克羅地亞與烏克蘭等實力分子取得首名出線，如今嘅冰島信心十足，配上無限鬥志，絕對有能力成為今屆世盃決賽周嘅最大驚喜！
格仔軍黃金一代打天下
憑住附加賽取得決賽周資格嘅克羅地亞，晉級過程雖然跌跌撞撞，但絕對冇人會懷疑佢哋實力。陣內擁有以應屆歐聯冠軍皇家馬德里中場莫迪歷為首嘅星級進攻線，將是列強爭霸嘅最強攔路虎，假如能夠再多少少運氣，甚至重演一眾前輩喺98世盃取得季軍亦未可料！
克羅地亞歷來出產過唔少世界級球星，想當年憑住神射手蘇加、中場普仙尼基同波班等，喺98世盃勇奪季軍，成為了球壇佳話。雖然之後克軍再未踏上過頒獎台，不過來到今屆決賽周，佢哋卻有可能再次帶來驚喜。
三線球星獨當一面
人腳方面，除莫迪歷之外，包括佢嘅皇馬隊友高華錫、巴塞隆拿中場重心拿傑迪錫、國際米蘭中場比列錫同祖雲達斯殺手文迪蘇傑，全都係獨當一面嘅世界級球星。至於防線亦有今季表現進步嘅路夫雲支撐，只要佢拍檔哥魯卡最終能夠解決傷患問題，呢條防線仍算足以信賴。
當然，克羅地亞都唔係全無缺點，就好似主力球員年齡偏大，後備力量稍嫌不足等，均係一定隱憂，不過只要運氣嚟到，配合天時地利人和，佢哋足以帶畀球迷最大驚喜。