周三凌晨國際熱身賽，世盃東道主俄羅斯喺主場揾嚟土耳其陪練。俄羅斯近期友賽戰績認真麻麻，踢咗6場熱身賽未贏過，呢仗面對實力有番咁上下嘅土耳其，睇嚟都難有甜頭，都係捧番讓球客勝好過。
（周三凌晨零時開賽）
作為世盃主辦國，俄羅斯除咗喺場地配套同賽事統籌上要落足工夫，唔想喺受全球矚目嘅世盃大舞台上失禮之外，佢哋都希望以東道主身份參賽嘅國家隊，可以喺決賽周取得好成績。球隊近期頻頻踢友賽備戰，不過就睇唔出「戰鬥民族」嘅取勝心，表現勁唔爭氣，近6仗友賽2和4負，上場面對奧地利，俄羅斯都畀對手全場撳住嚟砌，睇嚟班波質素同狀態都唔係好掂。
土耳其辛基斯安達當弗
相反無緣世盃嘅土耳其，冇大賽任務喺身反而踢得更放，近4仗友賽未輸過取2勝2和，尤其隊中有今季喺羅馬表現標青嘅攻擊手辛基斯安達坐鎮，進攻有保證，面對後防實力一般嘅俄羅斯，想偷雞話咁易，讓球客勝實係好路。