衞冕世界盃嘅德國，今晚熱身賽作客鄰國奧地利，德國踢完今仗就會公布最後23人決選名單，門神紐亞亦會喺養傷8個半月後正式復出擔正，為世盃試刀，德國傳媒估計勒夫會排出強陣爭勝，遇上近況大勇全無包袱，兼且熟晒路嘅奧地利，相信可以繼續合演入球騷，大盤係投注首選。
（周日凌晨零時開賽）
德軍最後23人呼之欲出
德國原定計劃踢完今仗後，下周一會公布將現有27人名單剔除4人，留低最後23人參戰俄羅斯世盃決賽周，不過德國足總官網疑似擺烏龍，喺周四發布咗一張23人出戰決賽周嘅海報，當中預期最可能被淘汰嘅門將奇雲查普、中堅莊拿芬泰希，中場施巴斯坦魯迪同前鋒尼斯彼德臣冇喺海報出現。雖然海報好快已經刪除咗，國家隊經理比亞荷夫亦出面澄清最後人選要睇埋今仗，不過睇到領隊勒夫已經定好晒心目中人選，佢哋近4場國際賽未贏過，決賽周前只剩低兩場熱身賽，當然希望贏番場壯聲威，中場大將卻奧斯踢完歐聯決賽仲放緊假，另外，謝路美保定養緊傷，前後場兩大主力曉姆斯同湯馬士梅拿因為今季比賽太多，獲勒夫特准休息，上述4人都唔會參加今場比賽。
奧地利無緣決賽周，但近況大勇，新帥法蘭高科達去年11月上任後4戰全勝，包括擊敗已打入決賽周嘅烏拉圭同主辦國俄羅斯，除今仗挑戰德國外，嚟緊仲會迎戰另一勁旅巴西，球隊目前冇晒壓力志在攞信心，遇強都唔會龜縮。奧地利今仗預計正選陣容除效力史篤城嘅右閘摩列斯包亞外，其餘10人都正在或曾經喺德甲搵食，主力戰將包括隊長巴姆加特寧加、阿拉巴、古多貝斯托拿同阿拿奧杜域同德軍戰將熟晒路，一埋牙就可以駁火。雙方近9次碰頭德軍全勝，當中8次總入球都係3球或以上，大盤值得再追。