今晚有場重量級國際熱身賽，意大利主場硬撼荷蘭，兩大豪門無緣世盃決賽周，均處於重建階段，雙方新帥文仙尼同朗奴高文都想贏波攞彩，勢必合演入球騷，捧大盤。
（周二凌晨2時45分開賽）
意大利去年尾世盃附加賽不敵瑞典，無緣今夏決賽周，換帥傳咗半年後，終搵嚟願意放棄辛尼特高薪的文仙尼接手，可見文帥誠意十足，佢立刻重召「契仔」巴洛迪利，巴神都好生性，唔單止對沙特阿拉伯有波入，亦成為球隊進攻核心，雖然文帥領軍2仗只得1勝1負，包括上仗1比3不敵法國，但呢位重視進攻嘅主帥揚言，要用1年時間追近法國，堅有決心。
荷蘭自2014年世盃奪得季軍後，連續缺席兩項大賽決賽周，終於搵來朗奴高文收拾殘局，佢圍繞里昂翼鋒迪比重建球隊，呢位前曼聯中場喺法甲翻生，喺剛結束球季聯賽轟入19粒，弗到爆燈。
由於兩軍處於重建期，無論文仙尼或朗奴高文，都大膽起用更多新人，呢班生牯仔博上位一定去盡，而兩位新帥都想贏波攞彩，為之後歐國盃外圍賽增強信心，預計今仗會係鬥攻格局，入球大更值博。
塞爾維亞試陣精打細算
另一場國際熱身賽，塞爾維亞於奧地利中立場迎戰智利，塞軍剛公布出征世盃嘅23人名單，伊雲洛域、高拉洛夫等後衞都有入選，呢班波一向守強攻弱，近5仗有4次開2球或以下，搵嚟冇份踢世盃嘅智利拍跳，塞軍又要避免出現傷兵，今仗唔慌多波入，細盤好路。
巴甲獨腳戲，帕拉拿主場對富明尼斯，帕軍近8仗聯賽未贏過，仲有主力莊尼盧卡斯同曉基路拿列斯坐波監，面對前列分子富明尼斯凶多吉少，平手盤梗係捧富軍喇。