一隊係世界盃常客，過去5屆都能躋身決賽周；一隊就係決賽周稀客，事隔36年先至再有機會登上國際大舞台，法國同秘魯今屆喺決賽周C組短兵相接，到底邊隊有機會脫穎而出？
人腳超班出線大熱
法國兩年前喺歐洲國家盃主場失利，決賽踢至加時以0比1輸畀有C朗拿度傷出嘅葡萄牙，功虧一簣。
事隔兩年，唔少主力好似基沙文、保羅普巴、尼高路簡迪都已踏入大熟大勇之年，配合新星基利安麥巴比同後備殺手基奧特，強如拿卡錫迪、安東尼馬迪爾及京士利高文等好手都只係列入後補名單，領隊迪甘斯今次點兵亦要面對「幸福的煩惱」。
金鑽中前場 後防欠經驗
不過講到法國後防就相對失色，事關阿仙奴中堅哥斯尼受傷缺陣後，除咗門將洛里斯之外，效力皇家馬德里嘅25歲中堅華拉尼，已經係防線代表國家隊次數最多嘅球員，而且其他球員好多都係25歲以下嘅年輕小將，例如烏姆迪迪、盧卡斯靴南迪斯、班捷文文迪等，全部都係首次代表法國出戰國際大賽，論經驗顯然較輸蝕。以法國目前人腳，要喺C組取得出線問題不大，但能否走得更遠就要視乎運氣以及臨場發揮。
全面升呢實而不華
秘魯近年喺南美洲區一直都係二線球隊，不過呢支紅白軍喺外圍賽力壓兩屆美洲國家盃盟主智利出線，再喺附加賽淘汰新西蘭殺入決賽周，小組賽隨時可再創驚喜。
荷西古里路打甩停賽令
秘魯對上一次亮相決賽周已經係1982年，今屆佢哋喺外圍賽頭6場分組賽只得4分，當時冇人估到佢哋可以相隔36年再次躋身決賽周，其實自從秘魯喺2015年美洲盃摘季，成隊波信心返晒嚟，最後12場外圍賽僅2敗，包括兩度打和阿根廷及擊敗烏拉圭，戰鬥力全面升呢，出線絕對唔係靠符碌。
秘魯出戰前收到好消息，隊長荷西古里路上訴成功唔使停賽，前線仲有33歲嘅法芬壓陣。呢名秘魯近年最具名氣嘅老將現時效力俄超莫斯科火車頭，稱得上有半個主場之利。基於同組只有法國牌面上較強，其餘2支對手丹麥、澳洲都唔係一線勁旅，秘魯想爭出線絕非癡人說夢話。