另外2支有份參與決賽周球隊西班牙及瑞士，周一凌晨會喺西班牙城市維拉利爾拍跳。「狂牛」西班牙自從由洛佩特吉執教後，過去2年不但於所有賽事保持不敗，如果單計熱身賽，8場比賽更加合共轟入23球，包括最近1場以6比1大炒阿根廷，對住近4場熱身賽全勝、近況唔錯嘅瑞士，隨時合演入球騷，捧大盤最上算。
（周一凌晨3時開賽）
前西班牙U23主帥洛佩特吉喺2016歐國盃決賽周後，接替迪保斯基執教西班牙，除咗喺世盃外歐洲區以10戰不敗力壓意大利首名出線，另外8場熱身賽亦取得4勝4和佳績，而且呢8場對手絕非弱旅，包括比利時、英格蘭、法國、德國及阿根廷等等，西班牙能夠喺佢哋身上加埋入成23球，進攻火力的確驚人。
瑞士排名高過西班牙
瑞士喺今屆世盃外歐洲區雖然要踢附加賽先取得決賽周席位，不過佢哋10場外圍賽其實亦攞到9勝1負，僅以得失球差輸畀葡萄牙，表現唔曳，而且佢哋單計熱身賽已4連勝，目前世界排名升至第6位，比起西班牙還要高2位，絕對有真材實料。兩軍對上一次交手於2010年世界盃決賽周，當時瑞士於分組賽首輪爆大冷以1比0擊敗西班牙，心理上亦唔輸蝕，就算今場作客一樣有本錢鬥攻，首選大盤。