尼馬又話傷實匿埋
今晚喺利物浦中立場上演嘅國際熱身賽，巴西將會硬撼「格仔兵團」克羅地亞，好番冇耐嘅森巴王牌尼馬有傳又傷，今仗或會避戰，好彩仲有菲臘比古天奴、「耶穌仔」加比爾捷西斯等撐住，況且「格仔兵團」近年對親南美球隊都冇運行，客勝有計。
（Now 618及633周日晚上10時直播）
講到巴西，大家最關心係王牌尼馬嘅傷勢，呢位聖日耳門前鋒自2月因右腳蹠骨受傷提早收咧後，抖咗3個月已經好番晒，不過喺日前操練中，忽然坐低除鞋畀軍醫檢查佢右腳，之前佢都講過如果覺得有乜唔妥就會停一停，費事再傷影響出戰世盃，今仗隨時避重就輕再抖抖。雖然尼馬未必出得，但巴西中前場仲有菲臘比古天奴、韋利安同加比爾捷西斯擔大旗，上場熱身賽對德國，就係靠韋利安助攻畀「耶穌仔」一箭定江山，一洗4年前世盃慘敗畀德軍1比7嘅奇恥大辱，呢2位英超兵同曾效力利物浦嘅古天奴熟晒地頭，今仗猶如有地利之助，表現更佳。
克羅地亞最怕南美波
另一邊廂，克羅地亞中前場主力呈現老化，隊長莫迪歷、拿傑迪錫、文迪蘇傑及比列錫等都年屆三十，活力點都差啲，今屆好大機會係佢哋最後一次參加世盃，嚟緊決賽周連場硬仗，點都重要過今仗拍跳，呢班老將難免有所保留。而且「格仔兵團」近5次出戰南美球隊，喺法定時間只得1和4負未贏過，包括2次輸畀今仗對手巴西，擺明畀森巴兵食住喇，今仗凶多吉少，客勝好路。