世盃E組競爭激烈，「5星雄師」巴西毫無疑問係出線熱門，每個位置都有頂級球員壓陣，卡士之強絕對係數一數二，同組另一支有「歐洲巴西」之稱嘅東歐勁旅塞爾維亞，踢法同樣偏向技術型，想睇好波一定要留意。
尼馬孭飛齊腳衝冠
作為紀錄性5次贏得世盃冠軍嘅「5星戰隊」，球迷對巴西嘅要求難免特別苛刻，對上3屆世盃未入決賽係難以接受，尤其上屆決賽周以東道主身份只拎到殿軍，加上4強對德國輸1比7嘅恥辱性慘敗，令人懷疑呢個「足球王國」已經瓦解。
三線當打富經驗
有「新比利」之稱嘅尼馬，被視為巴西爭冠嘅領導人物，4年前佢以22歲之齡背負全國希望，最終喺8強就嚴重受傷，埋下巴西4強慘敗伏線。尼馬喺今季季中因傷休養幾個月，令人懷疑佢有冇足夠狀態應付決賽周，不過隨着佢熱身賽復出對克羅地亞即有士哥，相信球迷都可以放下心頭大石。和4年前相比，現時尼馬更加成熟，加上身邊出現加比爾捷西斯、菲臘比古天奴等可靠拍檔，相信佢可以更輕鬆扮演領袖角色。
事實上，巴西喺外圍賽以近乎無敵姿態，18場賽事只輸1場嘅佳績出線，領隊迪迪亦成功將新舊球員磨合，中前場都係最當打嘅年輕球員，後場就有馬些路、堤亞高施華等經驗豐富老將壓陣，美中不足係「最佳右閘」丹尼爾受傷無緣入選，否則王者巴西嘅陣容可以話係無懈可擊。
陣容戰術考起少帥
前南斯拉夫出晒名盛產天才球員，可惜分裂之後令人才分散，其中塞爾維亞亦繼承「天才搖籃」嘅傳統，時隔8年之後終於再戰世盃決賽周。塞爾維亞陣中有不少經驗豐富的戰將，亦有潛質優厚嘅好波之人，人腳可以話係非常齊整，不過呢支東歐雄師材料齊全，獨欠一個可靠嘅「大廚」。
塞爾維亞喺外圍賽以小組首名晉級，雖然話同組嘅愛爾蘭同威爾斯都唔係一線勁旅，但塞爾維亞穩定成績仍值得表揚，尤其伊雲洛域、高拉洛夫同尼曼查馬迪組成嘅防線，經驗同硬淨兼備，中前場就有拿積、米連高域沙域、杜辛泰迪治同阿歷山大米祖域等好波之人，攻守能力都值得信賴。
卡帥「白紙一張」亂晒章
可惜政治問題始終影響球隊發展，帶領塞爾維亞踢外圍賽嘅主帥梅斯林，竟然喺出線之後因為同足總高層不和被炒，改為從未有執教經驗嘅卡斯達積領軍，呢位「少帥」上任後一直為球隊試陣，到現時為止都似乎未搵到最適合球隊嘅陣容同戰術，加上無故褫奪伊雲洛域隊長職務，引嚟球迷唔少質疑聲音，如果唔及時撥亂反正，隨時會浪費一班好球員。