今晚國際熱身賽，「三獅兵團」英格蘭再度出擊，主場迎戰哥斯達黎加。今仗係英格蘭決賽周前最後檢閱，有指占美華迪（華Dee）等二線兵有機會打正選，難得擔正一定搶韁，主勝太熱冇肉食，不妨轉玩半場主勝。（Now 618及633周五凌晨3時直播）
英格蘭踢埋今場之後，就會前赴俄羅斯備戰世盃決賽周，主帥修夫基於上仗拍跳贏尼日利亞2比1之役，哈利卡尼、史達寧、迪利阿里等正選全部有出，相信「修哥」都幾滿意主力嘅表現，因此，臨出發前最後一仗拍跳，佢想趁機派多啲副選，考察佢哋嘅狀態。英國傳媒爆料，李斯特城神鋒占美華迪會打正選，紅軍新仔阿歷山大阿諾特、熱刺左閘丹尼路斯及史篤城門將畢蘭特亦會擔正。
哥斯達黎加防線欠穩
哥斯達黎加上屆世盃殺入8強，全憑一條固若金湯嘅防線，今屆沿用大部分舊班底，包括幫皇馬完成歐聯3連冠嘅神龍基羅拿華斯，不過哥軍近8仗只得2場保清白之身，合共失咗11粒。何況英格蘭近2仗主場出擊，都喺上半場取得領先優勢，包括3月尾對意大利，就係華Dee開紀錄，預計佢哋今仗初段就會有波入，一於捧半場主勝。