比利時及突尼西亞均有頂級戰將缺席今屆世盃，比利時嘅羅馬中場尼恩高蘭冇入選大軍，不過比利時陣容天才橫溢，絕對彌補到空缺；突尼西亞則有外圍賽神射手馬沙卡尼重創缺席，加上人才凋零，相信難於G組突圍！
華麗班底 魔性澎湃
有「歐洲紅魔」之稱嘅比利時近年人才輩出，陣中3線主力包括盧卡古、夏薩特、奇雲迪布尼、艾達韋列特、高柏尼、維頓漢及泰拔高圖爾斯等全部係英超Big 6正選，華麗及實力並重，加上華美倫、梅利亞及保耶達等，比利時大軍過去幾季於歐洲頂級聯賽中，強奪超過10個聯賽及盃賽冠軍，堪稱冠軍級陣容。
比利時後場擁有豐富經驗，中前場球員則後生有活力，而且擁有數名可扭轉局勢嘅「妖人」，夏薩特及奇雲迪布尼絕對係當今球壇最具威脅力嘅中場，前線坐擁「魔獸」盧卡古，即使後備席上嘅巴舒亞伊，都有能力一腳射死對手，球隊經過2014世盃及2016歐國盃兩屆大賽浸淫，加上對同組英格蘭底蘊瞭如指掌，有力於小組取得首名資格。
主帥調兵功力受質疑
比利時唯一隱憂，就係主帥馬天尼斯。呢名西班牙籍領隊過往喺英超只係執教中下游球隊，能否管住一班球星實屬疑問，舊年奇雲迪布尼就曾經公開批評馬天尼斯戰術唔掂。以比利時人腳應付分組賽當然冇問題，但去到淘汰賽，當機立斷嘅調兵遣將功力，將成爭取佳績最大絆腳石。
射手缺陣 難有作為
突尼西亞相隔12年再度殺入世界盃決賽周，原本可喜可賀，可惜外圍賽首席射手馬沙卡尼因傷無法出席，令呢支有「迦太基之鷹」之稱嘅北非球隊，未起飛先折翼。
效力艾杜哈尼嘅前鋒馬沙卡尼，喺卡塔爾聯賽煞科戰整傷十字韌帶，球會聲明指佢要休息6個月，直至今年10月先可復出，緣盡決賽周。突尼西亞領隊馬奴爾形容，國家隊冇咗馬沙卡尼，猶如阿根廷冇咗美斯一樣咁嚴重。
靠中場掃蕩抵禦強敵
突尼西亞「4231」陣式類似歐陸踢法，擅於利用雙翼衞助攻，喺非洲區外圍賽以不敗戰績殺入決賽周，但同組面對真正歐陸球隊比利時及英格蘭，睇怕會相形見拙，惟有倚重中場兩名硬漢費贊尼沙斯及穆罕默德賓艾摩做掃蕩，盡力抵禦兩軍猛攻。
一般估計突尼西亞喺小組搶分目標，會係實力相若嘅巴拿馬，睇番賽程編排兩軍最後一輪先交手，如果真係咁好彩畀佢哋守和比利時或英格蘭其中一隊，最後一仗佢哋必全力出擊，希望打破1998至2006三屆1場不勝嘅悶局，贏波兼奇迹出線。