俄羅斯世盃聽晚開波！「列強起動」最後介紹H組「分組賽旅遊團」成員波蘭同日本。兩隊近年出席決賽周表現一般，唔似會行得遠，今次波蘭有羅拔利雲度夫斯基孭飛，日本就搵新教頭西野朗救亡，當然希望喺今次旅程玩多幾日，唔好咁快返屋企。
英雄羅拔 隨時變身
波蘭喺世盃歷史上威過，曾經拎過兩次季軍，不過進入千禧年後，佢哋喺2002年同2006年兩次入決賽周，同樣喺分組賽玩完。今次波蘭終於等到羅拔利雲度夫斯基出現，梗係希望佢好似超級英雄咁變身做救世主啦！
2002年同2006年世盃，波蘭都喺連輸兩場嘅情況下，只能夠喺最後1場分組賽贏波拎個安慰獎，距離出線嘅目標睇落都幾遙遠。好彩嘅係，今次波蘭有羅拔利雲度夫斯基孭飛，佢喺外圍賽個人喪入16球，勁到好似超級英雄電影嘅主角咁。
外圍賽個人癲入16球
事實上，波蘭喺外圍賽得28個入球，羅拔仔攻入16球真係好癲，特別係佢哋嘅2號射手高拿斯基得3個入球，證明羅拔仔真係有能力1個救全家，難怪連皇家馬德里都希望喺拜仁慕尼黑手上撬走佢，搵佢幫新教練開創新時代。
就算羅拔仔被重點看管，都唔代表波蘭失去所有戰鬥力，因兩年前嘅歐國盃，佢哋就喺羅拔仔得1個入球嘅情況下入到8強，仲喺分組賽打和過德國，只不過互射12碼不敵最後攞冠軍嘅葡萄牙，有機會喺俄羅斯玩多幾日。
臨陣易帥 堅拒認命
日本喺俄羅斯世盃開始前幾個月，突然炒夏利荷錫魷魚，安排新帥西野朗接手領軍，不過佢嘅「超攻擊」打法，似乎喺熱身賽行唔通，大和魂究竟今屆可以行到幾遠？唔多樂觀囉！
1998年起，日本連續6次躋身決賽周，當中得兩次入16強，包括2002年以半個東道主身份喺分組賽出線，同2010年喺南非被全世界睇衰下突圍，南非世盃開幕前，教頭岡田武史幾乎被網友鬧到佢辭職，佢好好彩燃起日本嘅大和魂，變身英雄創造奇迹。
擁亞洲超豪華陣容
今次日本嘅形勢有啲似2010年，出發集訓前受到球迷冷待，西野朗承受嘅壓力唔會細過當年嘅岡田武史。不過，日本球員喺逆境下特別搏，《足球小將》主角戴志偉嘅「比賽仲未完o架」係佢哋格言，相信東瀛武士唔會咁易認命投降。
日本擁有亞洲嘅超豪華陣容，唔止有歐洲外流經驗嘅球員多，本田圭佑、長友佑都甚至宇佐美貴史更效力過頂級球會，只要打出本身風格，表現唔會差過哥倫比亞太多，如果頭兩場有分，尾場對波蘭就易踢得多。
帥料：拿華卡（波蘭˙60歲）
2013年開始執教波蘭，代表作係領軍躋身2016年歐國盃8強，當時僅以互射12碼不敵葡萄牙。拿華卡強調快速壓迫戰術，藉此利用反擊爭取入球，球隊喺外圍賽就攻入28個「士哥」。
波蘭世盃戰鬥史
波蘭喺1938年首次出席世盃決賽周，而且喺1974年同1982年得到季軍，不過佢哋喺1986年16強出局後，連續3屆拎唔到決賽周資格，就算喺2002年同2006年重返大舞台，命運同樣係分組賽出局，意味佢哋今次去俄羅斯，背負重振國家足球嘅責任。
帥料：西野朗（日本˙63歲）
西野朗喺2008年帶領大阪飛腳奪得亞冠盃冠軍，可惜隨後佢執教神戶勝利船同名古屋鯨魚，同樣失敗收場，前年佢加入日本足協擔任技術委員會顧問，今年3月出山接管日本國家隊帥印。
日本世盃戰鬥史
自1998年首次參賽起，日本已連續6屆躋身世盃決賽周，不過當中得2002年同2010年能夠闖入16強，其餘3屆同樣喺分組賽出局，而且入球數字偏低，對上5屆嘅17場賽事得14個入球，平均每場得0.82個入球。