世盃B組首戰周五晚上將會喺聖彼得堡上演，由摩洛哥硬撼伊朗；兩隊向來都以防守穩健見稱，而且實力分野唔算太大，今場係雙方喺今屆世盃舞台首騷，開波初段肯定會睇定嚟踢，尤其伊朗近年喺分組賽都表現保守，經常同對手半場打和，1.75倍嘅半場和值得追捧。（Now 618及616周五晚11時直播）
闊別決賽周20年嘅摩洛哥，可以再次登上世盃舞台肯定興奮，從呢支北非勁旅近期標青嘅熱身賽戰績研究，就睇得出摩洛哥為備戰今次大賽，絕對稱得上花盡心機。摩洛哥喺今屆世盃非洲區外圍賽表現強勢，踢過8場比賽當中只係失過1粒，可見由效力意甲祖雲達斯嘅隊長貝拿迪亞領軍有方，以佢為首嘅防線夠晒穩陣。
相比之下，摩洛哥進攻表現就飄忽得多，8場外圍賽當中就有4場冇波入，火力明顯疲弱，加上摩洛哥長時間冇踢過世盃決賽周，大戰經驗明顯輸蝕，睇嚟領隊連納特對球隊實力心中有數，預料今場唔會畀班球員踢得太進取咁冒險。
亞洲球隊伊朗繼上屆之後再次闖入決賽周，論經驗肯定遠勝摩洛哥，尤其主帥奎羅斯縱橫歐洲各大聯賽多年、更曾帶領葡萄牙出戰世盃，絕對深知出戰大賽期間踢出穩健防守嘅重要性。所以今場為搶得分數，伊朗就算擺出鐵桶陣都在所不惜。
伊朗踢法保守
睇番佢哋喺亞洲區外圍賽第3圈踢過10場比賽，當中只失過2球，防守能力絕對唔差。而且伊朗過去2屆世盃保守嘅踢法，已令球迷留下深刻印象，以伊朗近6仗分組賽有5次開半場和，加上同摩洛哥實力接近實屬「五五波」，半場和機會甚高咪錯過。