世盃分組賽進行第2日賽事，頭場上演A組大戰埃及鬥烏拉圭，今仗焦點原本落喺3大射手穆罕默德沙拿、蘇亞雷斯同卡雲尼同場較量，可惜「埃及美斯」有傷，就算能夠趕及復出，狀態亦肯定打折扣，本身已經「兩個打一個」嘅烏拉圭更加佔盡上風，烏拉圭讓半一，波童捧上盤。（Now 616、618及ViuTV 99周五晚8時直播）
埃及雖然貴為7屆非洲盃冠軍，不過講到世盃成績卻幾乎一片空白。埃及史上只係踢過2次決賽周，分別喺1934年及1990年，2屆加埋踢咗4場比賽從未贏過，只得2和2負；相反2屆冠軍烏拉圭世盃經驗豐富，其中2010年更加勇奪殿軍，喺大賽經驗方面，烏拉圭可謂贏對手幾條街。
哨牙蘇卡雲尼默契十足
埃及今屆喺非洲區外圍賽表現唔錯，第3圈力壓對上3屆都有份踢決賽周嘅加納出線，而且仲有穆罕默德沙拿、艾利尼等英超球星壓陣，賽前唔少球迷都睇好佢哋可以喺實力平均嘅A組突圍，可惜人算不如天算，王牌沙拿喺歐聯決賽傷出，嚴重影響埃及賽前部署。沙拿受傷至今未有踢過1場正式比賽，今仗能否上陣仲係未知數，就算可以趕及復出，狀態亦唔慌好得去邊，對埃及嚟講絕對係沉重打擊。
烏拉圭本身擁有「哨牙蘇」蘇亞雷斯及卡雲尼2大射手，牌面早已高過單天保至尊嘅埃及，依家沙拿傷勢唔明朗，烏拉圭優勢更加明顯。仲有一點要留意，烏拉圭領隊泰巴尼斯已經連續3屆領軍出戰決賽周，陣中大部分主力亦已合作多年，講默契喺今屆決賽周分子入面算係好好嘅一隊，有利佢哋今屆比賽走得更遠，今場烏拉圭讓半一，波童推介上盤。