今晚世盃B組首輪爆發「雙牙大戰」，由葡萄牙硬撼西班牙。葡萄牙不嬲保守到暈，西班牙開波前先搞單陣前易帥大大鑊，軍心大亂，仲要搵冇乜執教經驗嘅名宿希亞路臨時頂檔，依家最重要係萬事求穩，隨時悶戰一場，加上兩軍近期碰頭例開半場和，為免影響出線必穩打穩紮，半場和值得追多鋪。（Now 616、618及ViuTV 99周六凌晨2時直播）
呢場伊比利亞半島打吡，絕對係今屆世盃分組賽焦點戰。雖然葡萄牙有「士哥」不斷嘅隊長C朗擔大旗，但2年前爆冷喺歐國盃封王，其實多得主帥費蘭度山度士嘅穩守突擊戰術。
葡萄牙複製歐國盃絕招
除咗C朗之外，其他球員都需要幫手防守，配合由門將魯爾柏迪斯奧、中堅比比及般奴艾維斯為首所組成嘅銅牆鐵壁，真係密到插針都插唔入，既然呢招使得，面對強敵一定會先玩龜縮。
但勢估唔到西班牙玩自爆，原本同「狂牛」續約2年嘅主帥洛佩特吉，日前又宣布世盃後轉教皇馬，激到西班牙高層紮紮跳，前日更不顧一切炒佢魷魚，急急搵嚟球隊總監希亞路接手。有指喺洛帥被炒之前，以隊長沙治奧拉莫斯為首嘅重心球員齊聲力保呢位教頭，可惜「狂牛」高層一意孤行，依家軍心大亂，雖然希亞路係西班牙名宿，但未必鎮得住一班大帝，而且佢退役後教過西乙奧維多1季咁大把，大部分時間都係做管理層，執教經驗堅少，教西乙都唔多掂，點帶兵打水準更高嘅世盃呀？
翻查紀錄，原來「狂牛」連世盃及歐國盃在內，近4屆大賽首輪僅得1勝1和2負，包括上屆世盃首輪以1比5慘敗畀荷蘭，為之後慘成世盃史上最早出局嘅衞冕球隊埋下伏線，依家內部立立亂，為免重蹈覆轍，一定會小心為上。西班牙於近4次大賽首輪全開半場和，而且近4次「雙牙大戰」，亦有3次開半場和，咁好路梗係追。