美斯蓄銳大晒冷
球王蓄銳「大」晒冷！今晚世盃D組首輪揭開戰幔，上屆亞軍阿根廷硬撼冰島。阿根廷近年專做「阿二」慘變「亞軍廷」，貴為球王嘅美斯今屆誓要奪冠而回，難得季尾抖到夠，勢必火力全開，可惜防線有後顧之憂，撞正入得又失得嘅「維京兵團」冰島，隨時合演入球騷，轉捧中位數2.5球嘅大盤最穩陣。
（Now 616、618及ViuTV99周六晚9時直播）
阿根廷喺上屆世盃決賽加時不敵德國0比1，之後連續2屆美洲國家盃皆於決賽飲恨，一度令隊長美斯冇癮退隊，好彩佢回心轉意，兼助球隊驚險殺入世盃決賽周，呢位球王亦揚言若今屆再捧唔到盃，就退出國家隊，決心十足。由於美斯效力嘅巴塞隆拿提早聯賽封王，季尾多仗佢有得抖抖，或者只係後備入替，為世盃留晒力，難怪之前同海地「拍跳」轟3粒，非常sharp醒。
阿根廷前線人才濟濟，隊長美斯就好似國旗上面嘅「五月太陽」咁，作為核心照起全隊，配合阿古路、迪馬利亞及麥斯美沙作支援，火力強勁。不過，中場悍將馬斯真蘭奴年紀唔細漸走下坡，防線只得奧達文迪較為可靠，絕對唔穩陣，連同正選門將羅美路於出發前因傷退隊，據報會用車路士門神韋利卡巴尼路把關，問題係佢喺車仔長居後備，點畀到球迷信心呀。
冰島高空轟炸博偷雞
2年前歐國盃一鳴驚人嘅神奇球隊冰島，今次係首度殺入世盃決賽周，但佢哋最衰係經驗唔夠，而且主帥賀基姆臣近期想加強攻力，反令其銅牆鐵壁嘅防線出現漏洞。「維京兵團」近4仗只得1和3負，共入5球卻狂失11球，全部開3球或以上，包括上仗熱身賽領先2粒下，被加納逼和2比2，明顯攻守失衡，不過面對同樣攻強守弱嘅阿根廷，一定恰死對方多矮仔玩高空轟作，實多波入，轉捧入球大（2.5球）好過。