黃金中場誓響頭炮
周日凌晨世盃D組首輪賽事，克羅地亞將會喺加里寧格勒面對尼日利亞。近年世盃常客「超霸鷹」尼日利亞，過去3次出戰決賽周初期表現都比較慢熱，分組賽首戰經常一勝難求，相反對手克羅地亞有「黃金中場線」強勢壓陣，贏面高幾班，主勝捧得過。
（Now 618及616台周日凌晨3時直播）
克羅地亞陣容鼎盛，尤其以莫迪歷同拿傑迪錫為首嘅中場線，實力絕對可以話係豪華級。2年前嘅歐國盃決賽周，克羅地亞就試過喺分組賽力壓勁旅西班牙，以首名出線，與尼日利亞嘅慢熱形成強烈對比，佢哋啱啱喺友賽就試過以2比1，反勝另一支有份出戰決賽周嘅非洲代表塞內加爾，呢場絕對有力打響頭炮。
尼日利亞最怕歐洲球隊
近年多次成功闖入世盃決賽周嘅「超霸鷹」，今屆喺深諳非洲足球嘅德國主帥盧亞帶領下，再次登上呢項大賽舞台，絕對係其中一支值得關注嘅非洲勁旅。尤其香港球迷不嬲睇開英超波，對尼日利亞陣中主力肯定唔會陌生，皆因包括隊長約翰米基爾、中場尼迪迪同前鋒伊恩拿祖，都有過豐富英超揾食經驗，其中世盃初哥伊禾比，將會被委以「超霸鷹」取勝重任，不過呢位22歲嘅阿仙奴生牯仔，大賽經驗依然比較缺乏，未必有力勝任。加上非洲球隊傾向各自為戰嘅踢法，去到世盃舞台根本難有優勢，「超霸鷹」近4仗熱身賽先後輸畀塞爾維亞、英格蘭及捷克，擺明畀歐洲球隊剋死。