人才過剩火力有保證
今日世盃頭場有C組出線大熱門法國登場，對手係亞洲代表澳洲。法國今屆人才過剩，唔少被認為有實力出戰決賽周嘅球員都落選，可見佢哋陣容幾咁強大。澳洲近年表現大不如前，而且佢哋以往喺決賽周分組賽對歐洲隊輸多贏少，5次對賽總入球都在3球或以上，今場預計又係一場大手交易，首選2.5球嘅大盤。
（Now 616及618台周六晚上6時直播）
法國領隊迪甘斯今次點兵出戰世盃面對「幸福的煩惱」，唔少好手包括阿仙奴前鋒拿卡錫迪、曼聯安東尼馬迪爾、聖日耳門防中拉比奧特，都喺冇傷冇病嘅情況下落選，可見依家法國人腳幾咁鼎盛。事實上，除咗常規主力基沙文、基利安麥巴迪或基奧特之外，其他副選費基亞、泰奧雲等等，剛過去球季都喺所屬球會有出色表現，無論迪甘斯派邊個落場，法國火力仍然有保證。
兩年前法國以主辦國身份出戰歐洲國家盃，可惜殺入決賽踢到加時輸畀葡萄牙0比1，未能喺主場球迷面前揚威，當時唔少主力如今仍在陣中，吸收經驗及教訓，今次捲土重來決心十足，首場對住同組牌面最弱嘅澳洲，當然希望大勝一場振軍心。
澳洲遇歐洲隊例多波入
澳洲雖然係應屆亞洲盃盟主，不過今屆喺外圍賽表現麻麻，先係透過附加賽擊敗敍利亞取得出線資格，然後再喺洲際附加賽淘汰洪都拉斯，先至攞到決賽周入場券，已經冇晒以往橫掃亞洲嘅氣勢。何況，澳洲對上3屆於決賽周對歐洲球隊輸多贏少，淨係分組賽5次交手，只取得1勝1和3負，5場總入球都開3球或以上，當中對西班牙同德國都輸3球或以上，今次面對唔同級數嘅法國好大機會再被大炒，捧2.5球嘅大盤最啱數。