鋼門拿華斯硬頂塞爾維亞
世盃分組賽E組首戰，周日晚上哥斯達黎加將會同塞爾維亞，喺薩馬拉一決高下。上屆世盃表現出色嘅哥斯達黎加，全靠穩守突擊戰術搵食，雖然少波入，不過就成功躋身8強，今場面對實力不俗嘅塞爾維亞，相信都會照辦煮碗，中位數2/2.5球入球細唔好錯過。
（Now 618及616周日晚上8時直播）
中美洲奇兵哥斯達黎加，上屆喺巴西世盃分組賽，力壓傳統勁旅英格蘭、意大利同烏拉圭，以小組首名出線，表現叫人眼前一亮。講到尾，真係要多得以門將基羅拿華斯領軍嘅後防，守得夠穩陣，嗰屆踢咗5場波，球隊都只係失過2球，尤其當時仲踢緊西甲細會利雲特嘅基羅拿華斯，大踢爭氣波急速上位，畀皇家馬德里睇中，近年仲做埋「銀河艦隊」嘅1號門將，有佢把關，哥斯達黎加班隊友都踢得放心好多。今屆球隊沿用上屆大部分主力，前線有拜仁雷斯同祖爾甘保，而中場個個都熟口熟面，相信今屆戰術應該唔會有大變動，繼續守住踢。
塞爾維亞入球率偏低
塞爾維亞今屆世盃外歐洲區D組取得首名直接出線資格，10場分組賽入20球，進攻表現唔算標青，喺決賽周開鑼前3場友賽，除咗大勝南美魚腩部隊玻利維亞之外，其餘2場士哥都係1球起、2球止，呢場面對踢慣防守足球嘅哥斯達黎加，都幾難咬得入。
況且喺賽程上，塞爾維亞下輪將鬥瑞士，最後一場先對巴西。鑑於巴西屬呢組出線熱門，隨時未踢最後一輪已鎖定晉級資格，到時塞軍要「偷雞」都易好多，所以今仗佢哋未必會chur得太盡，只要有分落袋都收貨，難免會踢得更保守，中位數2.5球嘅入球細得1.46倍冇肉食，揀低「半格」中位數2/2.5球嘅1.6倍細盤仲好！