精算師點肯16強遇巴西？！
世盃F組分組賽今晚開打，頭炮由兩支出線熱門德國同墨西哥，喺莫斯科路斯尼基球場交鋒，基於抽籤形勢，呢組次名出線球隊極可能會喺16強硬撼大熱門巴西，雙方當然希望能夠搶到首名出線，尤其德國團隊向來精於計算，佢哋近年大賽決賽周例牌旗開得勝，實力上又遠勝青黃不接嘅墨西哥，德國讓一球，1.86倍上盤係投注首選。
（Now 616、618及ViuTV 99周日晚11時直播）
衞冕嘅德國近年大賽都習慣先聲奪人，近6次大賽決賽周首仗都贏波，近5次更力保不失，近兩屆世盃首戰仲先後大炒澳洲同葡萄牙4蛋，可見佢哋最清楚先聲奪人嘅重要性，今屆情況尤其緊張，因為16強淘汰賽抽籤，E組同F組首次名將會交叉對壘，巴西喺E組明顯一支獨秀，同組嘅瑞士、塞爾維亞同哥斯達黎加恐怕幾難動搖到巴西嘅首名出線資格，換言之佢哋極有機會喺16強遇上F組次名，德國今場又點會唔打醒精神先解決同屬F組嘅最強對手呢？更何況德國目前正處於盛世，三線人腳鼎盛，整體實力同可用兵源更勝上屆冠軍隊，今場下咗格殺令，墨西哥真係好難偷雞。
墨西哥「小豌豆」被睇通
墨西哥近年大賽表現非常平穩，已經連續7屆打入決賽周，而且都可以喺小組出線，但對上6次悉數喺16強止步，現時球隊出現青黃不接現象，中場雖然有一定創造能力，但前線「小豌豆」查維亞靴南迪斯實力經已見盡，德軍守將亦熟晒佢路，何況墨軍全隊平均年齡高達28.8係F組最老，講近況亦唔理想，近4場國際賽加埋只入得1球，面對實力一般嘅克羅地亞同丹麥都要輸波，無論攻守質素同德國都有明顯差距。兩軍歷來共曾交手11次，德國取得6勝4和1負佳績，墨西哥唯一勝仗已經係卅多年前（1985年贏過西德），雙方最近一次交手係去年洲際國際賽，墨西哥慘敗1比4，預期今晚都難擋決心旗開得勝嘅德軍。