世盃進入第4日賽事，兩大熱門巴西、德國齊齊登場，其中森巴兵團巴西會喺E組尾場鬥瑞士。巴西上屆遭逢歷史性慘敗最後僅得殿軍，今屆捲土重來誓一洗頹風，不過佢哋近9屆決賽周首仗分組賽有7次只能小勝1球，今場讓球盤巴西讓一球、球半有風險；擅踢穩守突擊嘅瑞士近年首場分組賽常有佳作，今場未必冇還擊之力，捧中位數2.5球嘅大盤最穩陣。
（Now 616及618周一凌晨2時直播）
巴西上屆以東道主身份出戰決賽周僅得殿軍，其中4強被德國大炒7比1更係國家隊喺世盃史上最大敗仗，足球王國一度跌入史無前例嘅低谷。好彩2016年現任主帥迪迪上任後成功大翻身，今屆喺南美洲區外圍賽以壓倒性姿態首名出線，而且球隊喺今年踢咗4場熱身賽全部贏晒，包括3月份作客以1比0擊敗德國報番上屆一箭之仇，強勢迎接今屆決賽周。
瑞士射手沙基利堅勁
巴西一向都係決賽周分組賽之王，由1982年起計，已經連續9屆以小組首名出線，而且9屆首仗均贏波，不過當中有7次小勝1球，單計近5屆亦只有1次保持清白之身，面對實力稍遜嘅北韓、土耳其或蘇格蘭都有失波。今屆巴西有右閘丹尼爾受傷無緣出戰，無論起用丹尼路雷斯或法格拿，經驗及實力都差一截，隨時被有快翼梳頓沙基利壓陣嘅瑞士有機可乘。
何況，瑞士近屆於決賽周表現相當不俗，對上4次參賽有3次能夠進身16強，其中4屆首戰取得2勝2和未輸過，包括於2010年一屆爆大冷擊敗當屆最後冠軍西班牙，瑞士今仗喺巴西身上搵到着數絕對唔出奇，讓球盤巴西讓一球、球半唔穩陣，轉捧中位數2.5球、有1.95倍嘅大盤仲穩陣。