首席司機羅拔仔靠得住
周二晚H組賽事，歐洲代表波蘭鬥非洲球隊塞內加爾，波蘭王牌羅拔利雲度夫斯基不但係今屆歐洲區外圍賽首席射手，近期嘅熱身賽亦keep住有波入。塞內加爾前線亦有沙迪奧文尼、基達巴爾迪等好手，面對防線唔算穩陣嘅波蘭大把入波機會，2.5球嘅大盤捧得過。
（Now 616及618台周二晚11時直播）
如果冰島係「神（臣）之隊」，咁有23人大軍中，有近半球員譯名以「斯基」作結嘅波蘭，就堪稱「司機（斯基）軍團」。今屆波蘭喺歐洲區外圍賽E組以首名出線，「首席司機」羅拔利雲度夫斯基個人射入16球，成為歐洲區外圍賽神射手。羅拔仔喺決賽周前2場熱身賽，更個人轟入3球，狀態冇跌Watt，仍然係波蘭最具威脅嘅前線尖刀。不過波蘭近5仗熱身賽只有對歐洲二流球隊立陶宛保持不失，其餘對住墨西哥、尼日利亞或南韓呢啲決賽周分子都有失波，防線演出畀唔到人信心，前面入波隨時唔夠後面輸。
小組實力平均場場要搏
塞內加爾對上1次打入決賽周係2002年，亦係該國史上唯一一次，當年佢哋喺揭幕戰以1比0擊敗衞冕嘅法國舉世震驚，最後更殺入8強，平咗非洲球隊喺世盃決賽周最佳成績。事隔16年，今次塞內加爾陣中更多為人熟悉嘅球員，包括效力利物浦嘅沙迪奧文尼、史篤城嘅馬美迪奧夫、愛華頓嘅伊祖沙古爾等英超兵，仲有曾經效力拉素、現已轉投摩納哥嘅前鋒基達巴爾迪，全部都已喺球會級比賽證明自己身價，有力成為今屆一路奇兵。
況且，此組被視為今屆實力最平均嘅一組，每仗比賽都要搏盡，既然兩軍都係攻強於守，預計今場會有唔少入波出現，捧2.5球嘅大盤最明智。