分組賽愛煲魚生粥
今晚世盃G組首輪賽事，「歐洲紅魔」比利時出戰巴拿馬。比利時有盧卡古、夏薩特、奇雲迪布尼等英超兵擔大旗，明顯超晒班，不過呢班波衰在慢熱，近年大賽初段都表現麻麻，巴拿馬首度殺入世盃決賽周，冇乜包袱下隨時有驚喜，今仗讓球盤比利時要讓2球咁多，寧捧巴拿馬下盤。
（Now 616及618台周一晚11時直播）
比利時今屆陣容鼎盛，盧卡古、夏薩特、奇雲迪布尼喺剛季英超表現出色，前中後三線板櫈深度又足，主帥馬天尼斯教過愛華頓，助教更係前阿仙奴射手亨利，連教練團都咁猛料。不過，佢哋有防線主力高柏尼因傷缺陣，另一中堅艾達韋列特剛季傷多過踢，狀態成疑，中場迪比利臨近季尾又明顯跌Watt，加上近日訓練期間，迪布尼過勇剷到隊友贊奴沙飛起，非常肉酸，事後贊奴沙亦大呻操練唔使咁樣剷法，似乎內部唔係好和諧。
巴拿馬冇包袱或有驚喜
來自中北美洲嘅巴拿馬，喺世盃外圍賽爆冷力壓洪都拉斯及美國，首次殺入世盃決賽周，佢哋大部分球員都喺中北美洲搵食，只有門將賓尼度、後衞艾歷戴維斯及伊斯美戴亞斯等少數球員外流歐洲。雖然個個都名不見經傳，但非常團結，亦都冇乜心理包袱，呢類奇兵最大特點係冇乜人識，靠拚勁一人走多步下，隨時有驚喜。
講真，巴拿馬今仗要搶分確實唔易，不過比利時喺近年大賽表現特別慢熱，儘管上屆世盃3場分組賽贏晒，都係全部贏得1粒咁大把，2年前歐國盃分組賽首仗，被一致睇好之下卻輸畀意大利，今仗可能小勝居多，讓球盤要讓到2球咁辣，轉捧巴拿馬下盤好過。