唔經唔覺，今屆世盃決賽周已經踏入第5個賽日，都睇到少少眉目，不妨從單打獨鬥及整體合作，呢兩方面去研究吓今屆賽事。
C朗愈老愈襟用抵讚
先講個人，最抵讚就梗係C朗喇，呢位葡萄牙隊長單天保至尊，面對西班牙喺劣勢下大演帽子戲法，最終追和3比3，尤其係末段轟入妙到毫顛嘅罰球，盡顯球技及強大心理質素。最難得嘅係C朗已經33歲，但佢自從由費格遜帶去曼聯之後，保持咗15年高水準表現，年過30亦未見有老化現象，愈老愈襟用嘅Super Star，值得尊重。
至於隊際方面，前晚我有份評述嘅阿根廷對冰島，雖然「潘帕斯雄鷹」有球王美斯助陣，但冰島並無懼色，最終逼和1比1，贏盡掌聲。學何B師傅話齋，佢話睇波咁耐都未見過一隊打442陣式，冇用類似法國防中尼高路簡迪全場緊盯美斯，而係採用一套區域聯防戰術，每個球員喺自己負責嘅區域中做足防守冇甩漏，嚴格地貫徹主帥嘅安排執行到底，互補不足，成功抵禦技高一籌嘅阿根廷，可作為經典嘅防守教材。
今屆另一個特色，係隨着引入VAR （視象裁判）協助執法後，國際足協為咗保持球證嘅威信，對於一些場上嘅判決，直播時很少重播太多唔同角度嘅慢鏡。我認為球證呢場判罰冰島嗰球12碼係過嚴，但明顯當時直播冇提供更多慢鏡頭，為免引起更多爭議。還好英文有句「Balls don't lie」，即係話足球唔會講大話，冰島門神荷杜臣勇救美斯嘅極刑，唔使為呢球枉判嘅12碼而輸波，證明上天係公平。
金句：強弱對碰亦常有睇頭，冰島有紀律聯防係弱隊搶分典範