分組首騷即遇悶波王
今晚深夜世盃G組壓軸戰，由「三獅兵團」英格蘭對「迦太基之鷹」突尼西亞。論牌面英格蘭無疑較高，但其擅長嘅快速反擊踢法，面對「世盃細盤王」突尼西亞未必可大派用場。首輪分組賽所見各隊踢法偏向謹慎，今場不妨再追中位數2.5球嘅1.68倍細盤。
（Now 616及618周二凌晨2時直播）
單計頭3個比賽日，8場分組賽賽事，得3場入波多過兩球，除咗揭幕戰主辦國俄羅斯大炒沙特阿拉伯5比0外，其餘賽事戰情都咬得甚緊，強如法國同阿根廷，面對牌面低一截嘅澳洲同冰島泊大巴都冇乜符，所以希望英格蘭今場會贏得輕鬆甚至大炒，只係球迷一廂情願諗法。
星味欠奉 修夫基穩陣行先
英格蘭曾經喺2010年世界盃對住同樣嚟自北非嘅阿爾及利亞，當時英格蘭粒粒皆星，被一致看好下慘被悶和0比0，而上屆對住巨人殺手哥斯達黎加又係0比0，最終「三獅兵團」分組賽一場不勝恥辱出局。英格蘭大賽失準已經唔係咩新鮮事，今場個Ｗ熱到得1.33倍，捧場客真係要小心。
今屆英格蘭被視為近年最冇星味一屆，領隊修夫基都決定穩陣行先，改踢3中堅應戰，今仗預計會派史東斯、基爾獲加及哈利馬古尼扼守中路，前線就靠哈利卡尼、史達寧、迪利阿里及連格數胡，論速度確實係夠快，但當對手縮晒喺後面，壓縮進攻空間嘅時候，就算你快到曉飛都冇用，睇番熱身賽及較近期嘅外圍賽，英格蘭防線確實冇乜失誤，不過入球能力亦受到限制，近8場就有7場開出細盤。
突尼西亞前鋒唔夠卡士
突尼西亞多年來都以穩守突擊為主，歷來決賽周踢咗12場波，有9仗總入球兩球或以下，當中98及02兩屆分組賽更做出「全細套餐」，最慘係外圍賽首席射手馬沙卡尼因傷落選，大大影響球隊入球能力，睇番3個前鋒都喺國內或中東球會搵食，級數有限，入球能力最強相信係雷恩中場卡斯里，要喺英軍身上取得入波並唔容易，細盤冇走雞。