沙拿復出絕地反擊
世盃分組賽第二輪，周三凌晨打到嚟，東道主俄羅斯將會坐鎮聖彼得堡迎戰埃及。俄羅斯喺世盃揭幕戰狂入靚波，大炒沙特阿拉伯5粒，不過呢場硬撼要搏命搶分，兼有穆罕默德沙拿復出嘅埃及，俄羅斯想過骨邊有咁易？寧願捧番埃及下盤好過。
（Now 616及618周三凌晨2時直播）
東道主首捷因對手業餘
東道主俄羅斯喺揭幕戰入嘅5球波，可以話一球精彩過一球，唔止俄國大佬普京喺看台包廂入面睇到笑晒口之外，就連中立球迷都大包眼福，可以話係為呢屆世盃盛事開咗個好頭。俄軍一班進攻球員好波固然抵讚，尤其後備上陣嘅卓利舒夫，大騷多年遊歷西甲賽場所練就嘅乖巧腳法，個人梅開二度，真係令球迷拍案叫絕，不過另一方面都真係要彈對手沙特阿拉伯，佢哋嘅業餘級防守演出，絕對唔係一支世盃決賽周球隊應有嘅表現，俄軍球員見對手頻頻送大禮，梗係把握機會入多幾粒。老實講，東道主上仗喺攻守兩端，都冇受到太大挑戰，5比0嘅戰果唔可以完全反映俄羅斯嘅真正實力，相反今仗面對埃及，先至係一班俄仔見真章嘅大戰。
「法老兵團」防線唔曳
有多位主力喺歐洲主流聯賽揾食嘅埃及，實力絕對有保證。上仗「法老兵團」雖然以0比1輸畀烏拉圭，但係成場比賽埃及一班後防球員表現其實唔曳，成功箝制對方兩位世界級前鋒蘇亞雷斯同卡雲尼，冇畀到佢哋太多發揮空間，防線穩健有目共睹。最重要嘅係，埃及法老王穆罕默德沙拿首戰輪休之後，呢場好大機會正選上陣，挑起進攻大樑，有佢在陣埃及進攻效率即刻升幾班，加上首戰輸波嘅埃及，為力保出線機會，呢場點都會焗攻。俄羅斯如果未能收拾上仗大勝嘅心情，以自滿嘅心態應付埃及，隨時會受到懲罰。睇好埃及擺脫首戰輸波嘅陰影，下盤唔好錯過。