又老又亂咬唔入瑞典
今晚世盃頭場上演F組賽事，北歐勁旅瑞典鬥亞洲代表「太極虎」南韓。瑞典今屆憑出色嘅穩守戰術，先後喺外圍賽及附加賽踢走荷蘭及意大利，踢法擅守不擅攻；南韓喺今屆外圍賽演出差強人意，匆匆上任嘅主帥申台龍亦未搵到心目中嘅最佳陣容，加上老將當道踢法料會穩陣至上，波童建議捧2.5球嘅細盤。
(ViuTV 99、Now 616及618周一晚8時直播)
瑞典領隊贊尼安達臣可能係今屆世盃委員會嘅眼中釘，事關佢先喺外圍賽踢走粉絲多籮籮嘅荷蘭，再喺附加賽淘汰4屆冠軍意大利，然後連瑞典「國寶」伊巴謙莫域毛遂自薦入隊佢都唔理，不斷為今屆世盃決賽周趕客，大大減弱咗今屆比賽話題性同吸引力，認真倒米。
唔選伊巴 瑞典玩穩守突擊
不過倒米還倒米，贊尼安達臣能夠領軍淘汰兩大勁旅絕對唔係符碌，其中附加賽主、客兩回合更成功「零封」意大利，可以睇到佢嘅穩守突擊戰術非常成功，如果勉強加入伊巴謙莫域，隨時打亂原有部署，恐會得不償失。瑞典決賽周前2場熱身賽同以0比0賽和丹麥及秘魯，踢法唔見太大突破，預計今屆仍以穩守踢法跟列強周旋。
南韓今屆喺亞洲區外圍賽12強賽只以次名出線，現任主帥申台龍喺外圍賽尾聲，臨時拉伕頂替史泰歷克掌帥印，雖然能保住決賽周席位，但之後熱身賽演出仍未畀到球迷信心，特別係防線一時用3後衞、一時用4後衞，令球員無所適從。南韓出戰決賽周前3場熱身賽只得1和2負，合共僅入1球。最攞命嘅係，23人大軍絕大部份都係「3字頭」老將，活力欠奉，就算孫興民「踢到曉飛」都冇用。睇埋往績，南韓對上3屆決賽周5次面對歐洲球隊，總入球全部開2球或以下，面對踢法同樣主守嘅瑞典，難有大量入球出現，捧細盤啱數。