世盃A組賽事，今晚烏拉圭會喺羅斯托夫球場出戰沙特阿拉伯。取得今屆世盃首勝嘅烏拉圭，經過首戰之後明顯已經入局，反觀啱啱畀東道主俄羅斯血洗嘅沙特阿拉伯，實力欠奉，呢場面對有頂級前鋒蘇亞雷斯同卡雲尼坐鎮嘅烏拉圭，隨時再輸多幾粒，烏拉圭讓2球照捧上盤。
（Now 616及618周三晚11時直播）
球迷喺今屆世盃揭幕戰，除咗見識到東道主俄羅斯嘅強勁火力之外，都應該目睹沙特阿拉伯令人咋舌嘅曳爆表現，咁嘅演出，真係會令唔少球迷質疑點解佢哋可以入到決賽周？睇過沙特阿拉伯首場嘅踢法，都知佢哋希望打出具觀賞性嘅控球戰術，不過呢種踢法對球員個人能力同球隊整體意識要求都奇高，沙特阿拉伯球員根本未達到嗰個水平之餘，仲想同實力更強嘅俄羅斯鬥搓波，明顯高估咗自己嘅實力。呢場對住牌面更強嘅烏拉圭，沙特阿拉伯如果唔能夠擺正自己嘅心態，真係隨時再出現大比數血案都唔出奇。
沙特兵本土搵食多
烏拉圭首戰取勝之後士氣大振，尤其大賽出名慢熱嘅佢哋，過去2屆世盃第2戰都可以贏到波，包括上屆擊敗英格蘭。而且烏拉圭陣中有世界級射手「哨牙蘇」蘇亞雷斯同卡雲尼壓陣，前場攻擊力可以話十分驚人，兩把尖刀個人能力更超晒班，往往靠自己搵食都可以殺出條血路。呢場只要一班極具潛質嘅中場小將，放膽表現自己，為兩位老大哥提供足夠支援，想大勝對手根本冇難度。烏拉圭近6次面對亞洲球隊贏5次，睇得出佢哋對亞洲波頗有心得，呢場上盤捧得過。
雖然沙特阿拉伯已經唔係第一次踢世盃，不過呢支中東球隊對大部分球迷嚟講依然好陌生，無他，皆因佢哋今屆世盃陣容當中，絕大部分球員都係嚟自本土聯賽，實力同經驗明顯輸幾條街，想偷雞都有心無力啦。