伊朗施守術困狂牛
爆冷暫時成為世盃B組「1哥」嘅伊朗硬撼西班牙，西班牙實力之強毋庸置疑，但陣前易帥始終有一定影響，上仗臨完場失分，有不少球迷便批評新帥希亞路錯誤調動，反之伊朗現時有3分喺手，今場如果和波，對出線都有好大幫助，主帥奎羅斯一向擅施「守」術，今仗面對強敵必穩陣行先，半場和更值博。
（Now 616及618周四凌晨2時直播）
西班牙於世盃前夕怒炒原領隊洛佩特吉，由經驗不足嘅名宿希亞路接手，以艾斯高、恩尼斯達、大衞施華組成嘅中場保持一貫控球打法，箭頭迪亞高哥斯達上仗亦梅開二度，只不過喺一度反先葡萄牙後，佢竟將「迪哥」換走，令前線失去牽制能力，成為最終被C朗射入靚罰球逼和3比3嘅關鍵。
希亞路臨場調兵未到家
其實對於西班牙嚟講，葡萄牙係小組最大對手，首戰同葡軍打和應該唔會打亂整盤部署，只要今仗贏伊朗及下仗擊敗摩洛哥，一樣可以出線。不過，希亞路臨場調兵遣將嘅功力始終受到質疑，而且門將迪基亞亦罕見犯錯，防線出現不穩，後衞出身嘅希帥，今仗料會先對症下藥，做好防守，再控球在腳伺機而動。
伊朗喺主帥奎羅斯帶領下，戰術極度保守，上仗對摩洛哥力拚至末段，藉對方擺烏龍險勝1比0，取得20年來首場世盃勝仗，信心大增。奎帥之前曾執教皇馬，對「狂牛」非常了解，他深明伊朗實力不及對手，為免過早失波陷於被動，初段防守異常集中，伊朗於近7仗世界盃分組賽，就有6次開半場和，相信今仗仍會擺出血肉長城，半場好氣好力下有機會保住不敗身，半和值得再追。