穩守突擊攞完秘魯着數
世盃C組第2輪分組賽，周四晚上丹麥將會喺薩馬拉球場面對澳洲。丹麥上仗靠犀利嘅防守反擊，擊敗秘魯取得首勝，效果奇佳，相反喺上仗畀法國擊敗嘅「袋鼠軍團」質素欠奉之餘，仲不嬲畀歐洲球隊剋住，呢場睇怕都難同丹麥周旋，捧番主勝好過。
（ViuTV 99、Now 616及618台周四晚8時直播）
面對攻勢猛烈嘅秘魯，丹麥防線喺上仗世盃首戰可以話係承受咗巨大壓力，仲因此輸咗球12碼畀對手，好彩秘魯未能將呢個絕佳機會轉化為入球，不過丹麥防線整體發揮其實唔曳，尤其有卡斯柏舒米高把守最後一關，後防絕對夠晒穩陣，呢位效力李斯特城嘅門神，嗰場就多次作出神救，狀態弗爆。而且丹麥除咗有密集防守之外，反擊效率都非常之高，上仗雖然射門次數不及對手秘魯，不過前鋒尤素夫保臣靠住一次快速反擊，就一射中鵠置對手於死地，睇得出佢哋班前鋒幾有威脅，加上基斯甸艾歷臣、湯馬士迪蘭尼同薛斯圖等球隊主力，都係喺歐洲主流聯賽揾食，質素有保證，實力比起澳洲梗係佔優。
澳洲決賽周怕咗歐洲兵
澳洲首戰雖然1比2僅敗法國，不過表現唔算太差，只係攻守水平實在同歐洲頂級球隊依然有距離，佢哋近6次喺世盃決賽周面對歐洲球隊，就有5次輸波，呢場形勢都不容樂觀，都係捧主勝更穩陣。