秘魯守得近8戰6不失
世盃C組第2輪分組賽法國鬥秘魯。法國首仗雖然擊敗澳洲旗開得勝，不過贏波過程絕不輕鬆；秘魯實而不華擅於防守，加上法國近4次於世盃面對南美球隊只得1勝，4仗總入球全開2球或以下，全冇甜頭可言，今場轉捧2.5球嘅細盤仲好路。
（Now 616及618周四晚11時直播）
法國首仗分組賽對澳洲雖然全取3分，但整體發揮只屬一般，特別係比賽上半場明顯受制於澳洲嘅密集防守，結果要靠換邊後視像裁判（VAR）之助，先由基沙文射入12碼打破悶局，進攻表現有待改進。「進攻三叉戟」基沙文、基利安麥巴比同奧士文尼迪比利上場表現貌合神離，3人唔止冇火花，而且過分集中地面進攻亦冇咩板斧，就算今場有機會改用基奧特打高空波，不過呢名車仔前鋒喺過去半年坐多過踢，而且早前熱身賽對美國被撞傷，初傷愈亦未有十足狀態，要入波唔容易。
決賽周4遇南美兵全細盤
秘魯上仗0比1不敵丹麥表現唔太差，尤其上半場球隊曾經博得12碼，可惜基斯甸古華一射沖天，未能先開紀錄，預計秘魯今場仍會以不變應萬變，先做好防守再搵機會打反擊。事實上，連埋首輪分組賽，秘魯近8仗國際賽有6仗保持清白之身，而且今屆外圍賽亦曾經守和有美斯坐陣嘅阿根廷，防守相當有水準。何況，法國過去4次喺世盃決賽周鬥南美球隊都冇優勢，4戰只得1勝3和，加埋只係入得1球，4次總入球全開2球或以下，今場再開細盤機會高。