格仔兵團最怕南美幫
今晚世盃D組次輪壓軸好戲，阿根廷火併克羅地亞。「潘帕斯雄鷹」首仗畀冰島逼和意外失分，球王美斯12碼宴客更成眾矢之的，不過全隊上下對佢力撐到底，團結一致有助反彈爭勝；「格仔兵團」克羅地亞老將太多，喺世盃呢啲頻密賽程未必回得切氣，今仗頂唔住為爭出線嘅阿根廷狂轟猛炸，阿根廷小讓平半，1.7倍上盤捧得過。
（Now 616及618周五凌晨2時直播）
老婆撐場幫美斯走出谷底
阿根廷首仗對住北歐球隊冰島，賽前被一致睇好下，意外畀對手逼和1比1，球王美斯更射失12碼，慘成失分罪人，幸好賽後佢講明會忘記過去，放眼嚟緊嘅賽事，而且一眾隊友如馬斯真蘭奴、阿古路等都力撐呢位隊長，阿根廷全隊上下空前團結，為出線可望打出爭氣一仗。
除咗隊友，家人支持同樣咁重要，據報美斯太太亦專程飛去俄羅斯為老公打氣，希望幫佢走出呢個谷底，另外據報主帥森柏奧利今仗會變陣出擊，大膽棄用馬高斯盧祖等星級戰將，改打343陣式，以美斯、阿古路及迪馬利亞組成前線3叉戟加強攻力，力圖喺小組旗開得勝。
卡連歷離隊鬧劇影響克軍
以3分排喺D組榜首嘅克羅地亞，首仗輕取尼日利亞兩粒似乎唔錯，但與其話佢哋表現好，不如話「超霸鷹」更曳。克軍日前仲爆出前鋒卡連歷不滿冇得擔正，藉詞有傷唔肯後備落場，而畀球隊踢出大軍嘅鬧劇，軍心點都有啲影響。「格仔兵」以莫迪歷、比列錫及拿傑迪錫為首嘅黃金中場係夠勁，但佢哋都年過30，而另一老將中鋒文迪蘇傑表現亦跌Watt，4位「老兵」喺頻密賽程下未回得切氣。況且克羅地亞近6次對南美球隊，法定時間僅得1和5負，明顯最怕南美兵，今晚遇上決心反彈的阿根廷凶多吉少，捧番上盤為妙。