盧卡古爭氣大爆發
今晚世盃頭場上演G組次輪賽事，「歐洲紅魔」比利時強戰突尼西亞。比利時「新魔獸」盧卡古首仗大踢爭氣波省兩粒，腳風順到「冇朋友」，配合弗到震嘅夏薩特及奇雲迪布尼支援，進攻水銀瀉地；突尼西亞冇分在手要焗攻，隨時合演入球騷，2.5球嘅大盤有1.75倍值得捧場。
（Now 616及618周六晚8時直播）
比利時中前場粒粒皆星，有進攻發電機夏薩特及奇雲迪布尼做支援，令前線嘅盧卡古及梅頓斯獲得源源不絕供應，兩人包辦首仗輕取巴拿馬3比0嘅全部入球，尤其係盧卡古頭頂腳踢入兩粒，一洗「盧渣古」污名，連熱身賽在內，佢喺近10仗國際賽狂轟15球，平均每場達1.5球，相當驚人，證明佢季尾傷勢已經好番晒。隊長夏薩特上仗雖然食白果，但佢近15次為國家隊披甲，入球連助攻合共炮製咗16球，有「夏神」助陣唔愁冇波入。
突軍冇分在手焗搶攻
非洲雄師突尼西亞首仗對英格蘭表現唔曳，幾乎可保住1分，可惜完場前抵擋唔到英軍嘅角球攻勢，最終輸1比2堅唔抵。突尼西亞冇分在手，為爭出線席位，今仗只有搶攻一途，不過首席門神穆斯哈辛上仗傷出，今仗繼續倦勤，後備龍門法魯克梅斯達化臨危受命或影響防線。論牌面比利時無疑高啲，但中堅高柏尼繼續養傷，另一後衞華美倫亦上陣成疑，可能改用保耶達，質素點都係差啲。翻查紀錄「歐洲紅魔」近4次對非洲球隊，有3次開3球或以上，主勝得1.26倍冇肉食，鬥攻局面下轉玩大盤好過。