今晚世盃A組尾輪上演榜首大戰，由東道主兼「1哥」俄羅斯迎戰次席嘅烏拉圭。兩軍已穩奪出線資格，俄羅斯為保首名晉級，今仗必定踢得保守，烏拉圭雙箭頭蘇亞雷斯及卡雲尼近況麻麻，好彩防線仍然穩陣，門神梅斯利拿更迎來百戰里程碑，梗係唔想失波咁掃興，料兩軍均會穩陣行先，半場和捧得過。
（Now 616及618周一晚10時直播）
俄羅斯秉承世盃東道主一貫戰績良好的傳統，自開幕後表現出色，頭2仗皆勝狂轟8球僅失1粒，喺「新沙皇」迪沙高耶夫受傷及箭頭史莫洛夫低迷下，主帥查切索夫果斷起用卓利舒夫及迪斯尤巴，2人合共入5粒，及時變陣乃致勝關鍵。依家俄羅斯累積6分，憑得失球較佳位列A組榜首，今仗面對同組戰力最強兼同分嘅烏拉圭，只要打和就可保住首名資格，相信會一改對上2仗戰術，以穩陣行先。
烏拉圭連續6仗冇失波
烏拉圭一向倚重雙箭頭蘇亞雷斯及卡雲尼數胡，可惜2人今屆狀態欠佳，夾埋入得1粒咁大把，令火力大減，上仗對住弱旅沙特阿拉伯只係小勝1比0，全無勁旅風範。而且「咬人蘇」、卡雲尼、高甸、馬田卡沙利斯等2010年世盃殿軍主力皆年過30，喺咁頻密賽程下未回得切氣，今仗料會拖慢比賽節奏，以穩陣行先。雖然烏拉圭攻力麻麻，但今屆頭2仗都保持清白之身，連埋之前嘅熱身賽，連續6仗冇失波，其中首席門神梅斯利拿若今仗上陣，就會係佢第100次為烏軍披甲，而高甸更達到第120次添，兩大防線重臣梗係唔想喺紀念日失威喇，加上烏拉圭近6次於世盃決賽周面對歐洲球隊，有5次開半場和，今仗面對同樣不急於求攻嘅俄羅斯，半場和值得再追。