今晚世盃A組尾輪兩場同時開打，其中沙特阿拉伯硬撼埃及一戰，兩軍2連敗已篤定出局，今仗只是為面子而戰，不過埃及王牌穆罕默德沙拿經過一場熱身後已上力，對住輸到冇晒信心嘅沙特，應可贏波攞番個尾彩，埃及讓半一撐上盤。
（Now 617及619周一晚10時直播）
沙特火力太弱捱打
沙特首仗慘吞東道主俄羅斯5蛋，次輪力戰下以0比1輸畀烏拉圭，雖然係有進步，但佢哋鋒力實在太疲弱，其足總高層更點名批評前鋒艾沙拿維表現極差，更有傳主帥比斯世盃後烏紗不保，軍心動搖。
埃及同樣喺頭2仗全敗，不過與王牌射手穆罕默德沙拿剛傷愈未上力有關，經上仗熱身兼攻入12碼，有助提升信心，相信佢嘅表現會更好。加上沙特近8仗世盃決賽周僅1和7負，正宗冇骨魚腩人見人蝦，預計埃及可以贏波攞番個尾彩、取得世盃決賽周隊史首場勝仗，今仗讓到半一都冇有怕，一於捧埃及上盤。