以攻代守Vs面子之戰
B組最後一輪分組賽，西班牙對非洲球隊摩洛哥。西班牙現時2戰得4分，即使和波亦肯定出線，但為爭首名需力求更多士哥；摩洛哥作風進取，雖已無緣晉級，但為挽回面子亦唔會放軟手腳。西班牙以往喺世盃面對非洲代表經常上演入球騷，4次總入球皆在3球或以上，今仗宜向入球大（2.5球）埋手。
（Now 616及618周二凌晨2時直播）
現時B組形勢，西班牙跟葡萄牙同得4分，得失球差亦一樣，伊朗則以3分排第3，由於葡萄牙最後一輪鬥伊朗至少有一隊失分，換句話講西班牙和波都肯定晉級，如果想爭首名嘅話，就要盡量爭取入波，萬一最後跟葡萄牙同分，計算得失球差時都有優勢。
狂牛兵團鋒強守不穩
西班牙首仗分組賽以3比3賽和葡萄牙，雖說對方射手基斯坦奴朗拿度狀態大勇，但一場波失3球，顯見目前西班牙防線存在不少漏洞。猶幸前鋒迪亞高哥斯達腳風不俗，首仗對葡萄牙個人梅開二度，上場對伊朗又一箭定江山，今屆賽事已累積3個入波，配合艾斯高、大衞施華及恩尼斯達等好手，進攻火力有保證。西班牙對上4次於世盃鬥非洲球隊共取得3勝1負，共入11球、失6球，4次總入球全開3球或以上，西班牙為爭首名，必定要爭取更多入球，既然防線不穩，勢必以攻代守求勝。
摩洛哥頭2仗分組賽全敗，篤定無緣進身16強，不過摩洛哥其實兩場都搶得唔少攻勢，特別係次輪面對葡萄牙早早失波，球員未有放棄繼續搶攻，踢法充滿侵略性，面對今屆演出唔算穩健嘅「狂牛兵團」防線，隨時有力偷雞，今仗預計出現有唔少入波，捧2.5球嘅入球大最明智。