南韓攻守曳到暈
今晚世盃F組次輪賽事，亞洲代表「太極虎」南韓火併墨西哥。南韓首仗以0比1不敵瑞典，全場一次中框射門都冇，表現備受抨擊；相反墨西哥首仗爆冷擊敗衞冕嘅德國，信心爆燈，加上歷來喺世盃決賽周面對亞洲球隊全部贏晒，今仗趁「太極虎」陷低谷乘勝追擊，墨西哥讓半一，波童捧上盤。
（Viu TV 99、Now 616及618周六晚11時直播）
南韓自從由申台龍執教之後，雖然成功攞到決賽周入場券，不過整體表現唔算令人滿意，特別係今屆決賽周前，南韓踢4場熱身賽只贏得1場，對住冇份踢決賽周嘅波斯尼亞、玻利維亞都贏唔到，用極差精神面貌迎接決賽周。
「仙人掌國」快速反擊煞食
南韓上場面對北歐球隊瑞典輸0比1，申台龍雖然派出黃喜燦、金信煜夥拍孫興民攻堅，實質上孫、黃墮後喺中場居多，可惜效果一般，全場僅得5次射門，1次中框都冇，如果唔係門將趙賢祐屢救險球，隨時以更大比數落敗，可以講係攻不銳、守不穩。
墨西哥決賽周前雖然爆出開集體性派對醜聞，不過對「仙人掌國」完全冇影響，首仗分組賽面對衞冕冠軍德國，球員展現強大決心，以查維亞靴南迪斯為首嘅攻擊線，快速反擊極為煞食，最終更靠夏榮羅辛奴一箭定江山贏1比0，表現極具說服力。況且，墨西哥一向都係「亞洲剋星」，呢支中北美洲勁旅歷來在世盃決賽周3次對亞洲球隊全部贏晒，其中2次贏2球或以上，今場墨西哥只係讓半一，捧上盤啱數。