奎羅斯倒戈復仇招呼C朗
B組最後一輪分組賽，亞洲代表伊朗將硬撼葡萄牙。葡萄牙正力爭首名出線，雖然基斯坦奴朗拿度（C朗）腳風極順，但今仗對手伊朗領隊奎羅斯同佢勁深牙齒印，必然盡力「招呼」呢位葡萄牙王牌；伊朗上輪死守功力令西班牙攞唔到甜頭，今場睇嚟都係「泊大巴」，葡萄牙即使贏到都唔慌會大炒，中位數2.5球嘅入球細1.62倍夠滋味！
（Now 617及619台周二凌晨2時直播）
上輪僅負西班牙獲好評
伊朗頭兩仗分組賽1勝1負有3分喺手，仍有出線機會，不過佢哋首仗能以1比0擊敗摩洛哥，全靠對方後備入替嘅布夏迪斯補時擺烏龍，幸運成分極高，上仗面對實力高一班嘅西班牙，伊朗踢出超水準，可惜入波被判詐胡，最終僅負0比1。不過從呢兩仗睇到，伊朗防守力及紀律極高，「鬥牛國」對住葡軍都入3粒，伊朗只輸1球，可見佢哋死守戰術非常奏效。
伊朗現時以1分落後畀「雙牙」，得失球亦輸蝕，今仗要贏波先可獲出線資格，加上伊朗近5次喺世盃決賽周鬥歐洲球隊輸晒，全部都輸2球或以上，望落好似唔夠踢，但渡邊年再次提醒大家，呢隊伊朗同以前嗰隊已經好唔同，「升呢」功臣自然係2011年開始執教伊朗嘅領隊奎羅斯，佢徹底改造咗伊朗踢法，由以往有前無後改成注重防守，喺亞洲區外圍賽第3圈嘅「12強賽」，佢哋足足有9場保持不失。
葡軍未脫「一人球隊」本色
當大家以為祖籍葡萄牙嘅奎羅斯會同國家隊眉來眼去時，其實啱啱相反，奎羅斯2010年敗走葡萄牙國家隊係不歡而散，尤其喺嗰年南非世界盃，葡軍0比1不敵西班牙出局後，C朗狂插話出局完全係奎羅斯責任，所以今場對奎帥嚟講屬最佳復仇之戰，重點當然要箝制C朗，盡量減低佢嘅威力。葡萄牙今屆所入嘅4球全部由C朗包辦，如能夠「封殺」C朗一挫佢銳氣，必屬奎羅斯賞心樂事，若然伊朗一個唔覺意令葡軍失分攞唔到首名，甚至爆冷贏埋出線，奎羅斯屈咗喺心8年呢啖怨氣，乜都吐番晒出嚟。
葡萄牙向來對住死守球隊無從入手，上仗對摩洛哥只能小勝1球，進攻板斧唔多，伊朗一心築起銅牆鐵壁嘅話，葡軍未必咬得入，今場大細中位2.5球細盤嗒落有味。