世盃F組第2輪，首仗滑鐵盧嘅衞冕德國移師索契嘅菲施特奧林匹克體育場，火併已有3分在手嘅瑞典，德軍首仗演出令人極度失望，但賽後即埋首備戰今仗，領隊勒夫勢必調整正選陣容，務求改裝戰車大搏殺，基於形勢上非勝不可，加上近年兩遇瑞典都開出總入球7+嘅入球騷，今晚一於再追中位數2.5球大盤。
（Now 616及618周日凌晨2時直播）
德國首戰以0比1不敵墨西哥，連個勢都輸埋，領隊勒夫今晚焗住變陣，上仗表現奇差嘅奧斯爾、基迪拉同柏頓赫特勢被撤換，由馬高列奧斯、根度簡同病愈嘅祖拿斯赫達頂上，佢哋上輪賽前明顯有輕敵之心，防線壓得太上，跑動亦漫不經心。喺慘遭教訓後，球隊立即取消一切對外活動改為閉門操練，由於今仗和波出線形勢會完全被動，必須全力搶攻求勝，當中多位名宿同助教高路斯力薦嘅馬高列奧斯勢必成為新重心，德國實力原本高瑞典兩皮，今場知恥近乎勇背水一戰，相信前線會生生性性奮力數胡。
瑞典領隊聲言對攻
瑞典首仗憑一個12碼小勝南韓，不過領隊贊尼安達臣講明面對強大嘅德國，如果死守肯定會被攻陷，佢要求球員敢於搶攻，擺明想趁德國病攞佢命！佢哋贏波後陣容唔會大變，只打算用曼聯嘅域陀連迪路夫代替邦圖斯贊臣出任中堅。瑞典喺上屆世盃外圍賽同德國同組，首場作客落後4球下追成4比4平手，次仗返主場半場領先2比1之下最終輸番3比5，結合今仗形勢，好有可能再演入球騷。