無論係踢得好或差嘅球隊，於今屆世盃都頗有睇頭，當筆者截稿前，好似烏拉圭、法國、葡萄牙及西班牙等強隊皆於次輪贏波，當中前兩者頭兩輪都係贏得1粒咁大把，好多球迷嫌佢哋贏得少，不過喺分組賽階段未必需要使出真功夫，先求贏波及出線方為上策。
森帥亂點鴛鴦 球員當災
反觀頭兩輪錄得1和1負僅得1分嘅阿根廷，成為眾矢之的被人狠批，但唾罵還唾罵，點都要深入淺出地搵出其低迷原因。論人腳實力，有球王美斯助陣嘅阿根廷絕對係勁旅，不過主帥森柏奧利唔識得審時度勢，臨場應變差，首仗被聯防出色嘅冰島逼和1比1、次仗慘吞克羅地亞3蛋，佢只係猛咁換前鋒入嚟，完全冇中場做聯繫，簡單嘅傳送組織都欠奉，試問點樣製造入波呀？面對一位亂點鴛鴦譜嘅教頭，球員未能喺合適位置發揮所長，都幾影響士氣，睇見美斯踢到頭耷耷就知喇。還好森帥話會負全責，隨時喺分組賽尾輪對尼日利亞前落鑊。
差劣龍門「熱粥裏的老鼠屎」
阿根廷中後場至門將全部都係次貨，尤其門將韋利卡巴尼路表現拙劣，再次證明一個差勁嘅門將，可令球隊由贏變和、和變輸。反而前鋒有美斯、阿古路、希古恩及保羅戴巴拿，星光熠熠到唔知點排陣，森帥又堅持美斯同保羅戴巴拿不能共存，之前未有好好試陣，到落後畀克羅地亞時先焗住派佢上陣，夾都未夾熟點會有好表現，到底森帥選呢位祖雲達斯前鋒入嚟係為乜呢？太多球星有時未必係好事。
實力較差嘅球隊，可以靠戰術及教練臨場調動去補救；反而教練冇料兼太多球星，就是大忌。雖然「潘帕斯雄鷹」現時出線仍未絕望，但相信機會只剩番兩個：渺茫同冇機會！
球隊大忌並非實力差，渣教練+多球星更攞命