再輸唔掂去盡博翻身
世盃H組第2輪，波蘭喺喀山球場硬撼哥倫比亞。兩軍首戰齊齊輸波，呢場為搶分肯定搏盡，不過波蘭前鋒羅拔利雲度夫斯基上仗冇料到，加上隊友唔爭氣，面對近期對親歐洲球隊都特別醒嘅哥倫比亞無力爭勝，寧願捧番哥倫比亞上盤好過。
（Now 616及618周一凌晨2時直播）
哥倫比亞首戰1比2不敵日本，主要係因為中場山齊士摩蘭奴，開波3分鐘就喺自己禁區犯手球，累到哥軍被罰食「全餐」，早段就踢少一個，兼輸埋球12碼，不過經過領隊柏加文換人調整後，哥倫比亞就算踢少個，表現都唔失禮，仲一度靠祖安昆特路嘅入波扳平，最後雖然輸波，球隊整體演出依然值得讚賞。況且哥倫比亞面對歐洲波頗有心得，近7次對歐洲球隊取得5勝2和，呢場吸取教訓，應有所改善。
波蘭態沉攻守都差
外圍賽表現強勢嘅波蘭，未能將好狀態帶去俄羅斯，喺世盃分組賽首戰就以1比2輸畀塞內加爾，整體表現可以話係曳到爆。除咗有後衞施安尼克自擺烏龍之外，基祖華克同門將施捷斯尼聯手，仲齊齊合演低級失誤，為對手送大禮失埋第2球，防線表現真係亂到一鑊泡。
而最致命嘅，係波蘭喺進攻方面都有阻滯，尤其球隊組織速度緩慢，畀對手有時間從容布防之外，仲搞到王牌射手羅拔利雲度夫斯基，經常陷入孤軍作戰嘅狀態，冇辦法完全發揮呢位德甲神射手嘅威力，加上波蘭前場攻擊板斧真係唔多，單調踢法好難威脅到哥倫比亞防線，哥軍讓平半必捧上盤。