反擊銳利捧得過！
今晚世盃H組次輪大戰，「東瀛武士」日本硬撼塞內加爾。兩軍均於首仗贏波，其中日本更取得8年來首場世盃決賽周勝仗，士氣大振，以香川真司、乾貴士及原口元氣為首嘅攻中3人組有料到，加上佢哋紀律嚴明，有力頂住塞內加爾來襲，仲有得受讓平半咁筍，必捧下盤。
（Now 616及618周日晚11時直播）
日本首仗以2比1擊敗大部分時間10人應戰嘅哥倫比亞，報番上屆慘敗1比4之仇，獲得自2010年後首場世盃決賽周勝仗，亦成為世盃史上首支擊敗南美兵嘅亞洲球隊，當然一開波打多個兼射入12碼，日本隊明顯有運行。雖然上仗交出助攻嘅本田圭佑有傷在身，今仗未必正選披甲，但以香川真司、乾貴士及原口元氣組成嘅攻擊中場3人組，支援單箭頭大迫勇也，反擊銳利。
賽前無論係隊長長谷部誠，抑或酒井高德及昌子源，老中青三代都不約而同話要忘記首場勝仗，講明塞內加爾球員身體質素一流好難應付，一定要保持警戒心，乾貴士更加話唔會求和，可見在主帥西野朗領軍下，眾將更加有紀律，有決心。
另一邊廂，塞內加爾上仗同樣以2比1擊敗種子球隊波蘭，不容小覷，陣中雖有沙迪奧文尼、麥巴耶尼安、馬美迪奧夫等好手，但強攻絕非其強項，穩守突擊先至最煞食，遇上先求穩陣嘅「東瀛武士」，反而未能盡展所長。有指隊長沙迪奧文尼於前日缺席操練，佢哋未有透露呢位王牌係咪有傷，淨係話佢比較攰，就算今仗趕及披甲亦未必夠弗，反擊力大打折扣。
由於兩軍同得3分，今仗應以唔輸為大前提，希望穩中求勝。睇番塞內加爾近期表現，連埋熱身賽在內，近6仗只得2勝3和1負，勝率唔算高，而且日本近4次於世盃分組賽次輪，錄得1勝2和僅1敗，今仗有得受讓平半，下盤有買趁早。