今晚世盃頭場上演G組第二輪分組賽，英格蘭對世盃新丁巴拿馬。經過首輪分組賽後，巴拿馬公認為今屆魚腩之一，球員年紀偏大，防線不穩吓吓要靠超技術阻截對手，上場慘吞比利時3蛋已經算少，今勻對住平均年齡第二細嘅英格蘭，正所謂拳怕少壯，樂比預期英格蘭可輕鬆過關，建議捧中位數2.5球嘅1.77倍大盤。
（ViuTV99、Now 616及618周日晚8時直播）
巴拿馬係32支決賽周球隊中，平均年齡最大嘅一隊，達29.6歲，陣中有6位球員擁有過百頂喼帽，雖然之後阿拔圖昆特路因傷選出，補選嘅阿維拿令平均年齡稍降，但從首仗睇嚟，一班後衞實在靠唔住，成日甩位搞到頻頻犯規領咗5張黃牌，只輸比利時3粒真係大話夾好彩。
武器眾多 對手難防
英格蘭今屆重用新人，首戰對突尼西亞表現唔錯，可能陣中冇乜大牌球星關係，踢來冇乜壓力，以快速打法狂轟對手，初段攻勢水銀瀉地，梅開二度嘅哈利卡尼亦盡顯超強把握力，今場又係開餐時。據英國傳媒報道，上場頻頻失機嘅史達寧及剛啱復操嘅傷兵迪利阿里今仗會退居後備，由拉舒福特及羅夫度斯卓克擔正，英格蘭依家可用之材甚多，除哈利卡尼外冇乜邊位係必然正選，占美華迪同韋碧克都未有機會落場，咁多武器對手真係防不勝防。
巴拿馬失波易崩潰
不過「三獅兵團」今場讓到球半、兩球略嫌過辣，既然要3粒先開得晒個上盤，倒不如博2.5球大盤好過，畢竟英格蘭防線未算好穩，上場對突尼西亞都失咗球12碼，今屆世盃實施VAR後多咗好多補判嘅12碼，對買大盤嘅朋友嚟講係好事，加上巴拿馬失波後易崩潰，上仗3個入球出現喺22分鐘內，今場英軍只要盡快入波，陷出局邊緣嘅巴拿馬焗搏下，入波必定陸續有嚟，到時「識巴拿馬總統」都救唔番！