世盃分組賽尾輪重頭戲，今晚H組塞內加爾會硬撼哥倫比亞。塞內加爾呢場只要和波，都可以穩奪出線資格，不過球隊後防甩漏問題嚴重，面對贏波即肯定晉級，兼有多位進攻好手壓陣嘅哥倫比亞，隨時失多幾球，中位數2.5球入球大諗得過。
（Now 616及618周四晚10時直播）
首戰曾經以2比1擊敗波蘭嘅塞內加爾，係今屆世盃第一支贏波嘅非洲球隊，嚟到最後一輪，包括突尼西亞、摩洛哥、埃及同尼日利亞都已經先後出局，塞內加爾變相成為非洲代表嘅最後希望。
「占士仔」法卡奧火力猛
不過由名宿艾路施斯領軍嘅塞內加爾，雖然至今未輸過波，不過防守表現真係唔算標青，上仗面對日本，球隊兩次取得領先優勢，都畀對手逼和，可見防線組織缺乏紀律性。可幸前場有攻擊核心沙迪奧文尼，帶住幾位狀態弗爆嘅前場小將，塞內加爾靠個人能力搵到食，呢場隨時以攻代守。
哥倫比亞第一戰面對日本，早早就打少一人，不過都可以靠出色個人技術破到蛋，雖然最後慘吞敗仗，不過可以見到攻力有番咁上下，賽果亦唔可以完全反映到球隊真正實力。上仗佢哋吸取教訓，完美展示強大火力，尤其「占士仔」占士洛迪古斯同祖安昆特路，兩位狀態上乘嘅進攻中場，頻頻為哥倫比亞前鋒餵靚波，配合突破好手古達度，以及把握力同經驗都充足嘅法卡奧，哥倫比亞前場絕對係人才濟濟，呢場為晉級淘汰賽要爭勝，隨時一開波就搶攻。況且哥倫比亞不嬲都踢開進攻足球，佢哋近7仗世盃決賽周賽事，6次開3球或以上，呢場隨時同塞內加爾打對攻，中位數2.5球入球大咪走雞。